Затрыманні, уварванне ў кватэру і ціск у зняволенні. Працяг рэпрэсіяў у Беларусі 21 красавіка
Адміністрацыя наваполацкай калоніі цісне на палітвязня Рамана Багнаўца, які адбывае там тэрмін, паведамляе ПЦ «Вясна».
Ягоная сястра распавяла, што больш за месяц не атрымлівала ад брата ніякіх звестак. І толькі некалькі дзён таму да яе дайшлі лісты ад Ромы, у якіх ён паведаміў, што ажно два тыдні яго ўтрымлівалі ў ШІЗА і што ў хуткім часе яго могуць перавесці ў памяшканне камернага тыпу (ПТК). Акрамя гэтага, ён паведамляе, што стаўленне адміністрацыі калоніі № 1 да зняволеных апошнім часам вельмі пагоршылася. Паводле Рамана, там «робяць усё дзеля таго, каб было сорамна за тое, што яны палітвязні».
Палітзняволенаму Уладзіміру Коласу ўзмацнілі рэжым і перавялі з «хіміі» ў магілёўскую турму. Прычына – «парушэнне правілаў унутранага распарадку ва ўстанове». Цяпер ён будзе адбываць тэрмін у магілёўскай турме № 4.
Стала вядома пра затрыманне Арсенія Пахомава. «Пакаяннае» відэа з ім з’явілася на праўладным тэлеграм-канале. На ім мужчына кажа, што яму 35 гадоў, ён часова беспрацоўны і яго затрымалі за тое, што ён «распаўсюджваў дэструктыўную інфармацыю пра вайну ва Украіне». ГУБАЗіК таксама паведаміў, што начамі затрыманы нібыта расклейваў налепкі з забароненымі выявамі.
Праваабаронцы даведаліся пра затрыманне ў Менску ўладальнікаў агенцтва нерухомасці КУБ – мужа і жонкі Васіля і Алы Раманенкаў. Учора, 20 красавіка, дадому да іх уварваліся супрацоўнікі ГУБАЗ і САХР. Васілю выставілі абвінавачанні паводле крымінальнага артыкулу 361-1 «Стварэнне экстрэмісцкага фармавання або ўдзел у ім». Мужчына быў зарэгістраваны ў плане «Перамога». У чым дакладна абвінавачваюць Алу, пакуль невядома.
Актывіст прафсаюзу РЭП Вацлаў Арэшка ўтрымліваецца ў СІЗА КДБ. Нагадаем, 19 красавіка з’явілася інфармацыя пра ператрусы ў офісах і кватэрах лідараў незалежных беларускіх прафсаюзаў, затрыманне кіраўнікоў і актывістаў прафсаюзнага руху.
У Мазыры затрымалі мужчыну Уладзіслава. Ягонага прозвішча праваабаронцы пакуль не ведаюць. На праўладным тэлеграм-канале ГУБАЗ размясціў відэа, на якім бачна, што мужчыну затрымалі ў яго ўдома. Сілавікі ўрываюцца ў кватэру, кідаюць мужчыну тварам у падлогу, заломваюць рукі за спінай, пытаюцца ягонае імя, а калі той адказвае, цынічна кажуць: «С Днем рождения, Владислав». На відэа мужчына прызнаецца, што «распаўсюджваў малюнкі, якія абражаюць прэзідэнта і супрацоўнікаў міліцыі». Магчыма, гэта адбылося 20 красавіка. Мужчыну выставілі абвінавачванне паводле крымінальнага артыкулу 369 «Абраза прадстаўніка ўлады».
Затрыманы 39-гадовы інжынер менскай дыстанцыі арганізацыі сувязі БЧ. З мужчынам ГУБАЗ запісаў «пакаяннае» відэа, на якім ён гаворыць, што ў 2020 годзе «браў удзел у несанкцыянаваных мерапрыемствах, а да нядаўняга часу быў падпісаны на экстрэмісцкія тэлеграм-каналы, з якіх рабіў рэпосты». Нібыта за гэта мужчыну і затрымалі. Ягонае імя і прозвішча на відэа не прагучалі.
МГМ, belsat.eu
