Вольга Івашына, жонка палітвязня Дзяніса Івашына, і супрацоўніца крамы «Адметнасць» Вольга Верамеенка перабіраюць скрынку з сумессю сухафруктаў і арэхаў, каб перадаць палітвязням, якіх цяпер трымаюць у СІЗА гарадзенскай турмы.
Трэба выняць усе разынкі, бо іх не прымуць.
«Мы збіраем перадачкі для тых палітвязняў, у каго далёка жывуць блізкія. Добрыя людзі прынеслі вялікую скрыню з сухафруктамі і арэхамі, цяпер фасуем. На перадачкі для 5–6 асобаў можа сысці цэлы дзень: спачатку закупка неабходнага, а пасля столькі ж часу – на фасоўку», – тлумачыць Вольга Верамеенка.
Свае перадачы атрымалі ўжо Вольга Маёрава і Алег Краўцоў. Заўтра перадача накіруецца да Алеся Пушкіна, затым у плане – Дзяніс Івашын і Яўген Разнічэнка.
Калі вы хочаце дапамагчы палітвязням, можна прынесці ежу для такіх перадачаў у гарадзенскую краму «Адметнасць» на Кірава, 3. Лепш за ўсё – сухафрукты, арэхі.
ВК, belsat.eu