Расейскія вайскоўцы ў Мэлітопалі затрымалі і вывезлі ў невядомым кірунку групу прадстаўнікоў мясцовага медыяхолдынгу, у тым ліку кіраўніка Міхайлу Кумка, паведаміла яго дачка Таццяна Кумок.
«Міхаіл Кумок, да выхаду на пенсію быў у складзе кіраўнікоў МВ-холдынгу. А МВ («Мелитопольские ведомости». – Заўв. рэд.) – гэта гарадская газета, сайт і, самае галоўнае, друкарня.
Пры засіллі варожай прапаганды, якую актыўна насаджалі акупанты з моманту з’яўлення ў горадзе, было чакана, што на журналістаў і супрацоўнікаў будуць ціснуць. І сёння гэта адбылося.
Дадому да журналістаў Юліі Альхоўскай і Любові Чайкі, выдаўца Міхайлы Кумка і да рэдактаркі Яўгеніі Баран, якая выпускае «Мелитопольские ведомости», прыйшлі ўзброеныя людзі, забралі іх і павезлі ў невядомым кірунку.
Імаверна, акупанты спрабуюць дабіцца супрацы. Пакуль ніхто з выкрадзеных на сувязь не выходзіў.
«Няма ніякай сувязі з мамай. Пад домам бацькоў стаіць машына акупантаў», – напісала Тацяна Кумок.
Гэта не першы выпадак, калі расейскія вайскоўцы выкрадаюць украінскіх журналістаў. У Запароскай вобласці прапала журналістка «Hromadske» Вікторыя Рошчына. Дзе яна, невядома. Магчыма, у палоне расейскіх вайскоўцаў.
МГМ, belsat.eu