У Варшаве пройдзе ўрачысты марш, прысвечаны 104-й гадавіне абвяшчэння БНР. Шэсце мае пачацца у суботу, 26 сакавіка, а 14-й гадзіне. Збор на пляцы Канстытуцыі.
У гэтым годзе акцыя на Дзень Волі будзе прысвечаная не толькі беларускаму парадку дня, але і падзеям ва Украіне. Заяўнікі шэсця адзначаюць: «Цяпер мы не можам быць побач са сваімі роднымі і блізкімі. Але ж мы разам! Разам змагаемся за свае правы. Разам перажываем за нашых братоў ва Украіне. Разам дапамагаем ўцекачам».
Дзень Волі традыцыйна адзначаецца ў гонар абвяшчэння Беларскай Народнай Рэспублікі 25 сакавіка 1918 года. За савецкім часам нават згадкі пра БНР былі забароненыя. Пасля абвяшчэння незалежнасці ў 1991 гэтая дата яднае прыхільнікаў свабоды, дэмакратыі і незалежнасці Беларусі. Угодкі БНР масава адзначаюць у Беларусі і далёка за яе межамі.
У гэтым годзе ўрачыстае шэсце ў Варшаве мае пачацца на пляцы Канстытуцыі. Арганізатары акцыі заклікаюць:
Мы пройдзем магутным маршам па вуліцах Варшавы – нязломнымі і сумленнымі людзьмі, якімі мы і з’яўляемся!
Мы яшчэ раз голасна сцвердзім, што беларусы супраць вайны ва Украіне. Мы зноў заявім: Лукашэнка і Пуцін –дыктатары, якіх не падтрымлівае беларускі народ!
104 гады таму нашыя мужныя продкі аб’явілі незалежнасць Беларускай Народнай Рэспублікі! Чакаем усіх вольных людзей на велізарным маршы, прысвечаным Дню Волі!
ХЗ belsat.eu