Міністр замежных справаў Літвы заклікаў ЕЗ дапамагаць Беларусі, а не проста назіраць, што адбываецца ў краіне

Міністр замежных справаў Літвы Габрыелюс Ландсбергіс лічыць, што Еўразвязу неабходна дзейнічаць, а не проста назіраць за падзеямі ў Беларусі. Тым больш, што ў краіну можа «прыйсці» прэзідэнт Расеі Уладзімір Пуцін. Пра гэта ён распавёў нямецкай газеце Der Tagesspiegel.

Габрыелюс Ландсбергіс. Фота: REUTERS

Таксама міністр заявіў, што нягледзячы на цяперашнія рэпрэсіі ўладаў супраць беларускага народу шляху назад ужо няма:

«Мы не можам сабе ўявіць, праз што праходзяць людзі ў Беларусі, колькі з іх трапілі ў турму, колькі зазналі жорсткае абыходжанне, колькі страцілі працу. У іх адабралі тыя маленькія свабоды, якія ў іх заставаліся. Але ў мяне склалася ўражанне, што ў Беларусі перайшлі рысу, пасля якой няма шляху назад. Людзі больш не давяраюць рэжыму. Пытанне толькі ў тым, як доўга пратрымаецца рэжым».

Ландсбергіс прыгадаў, што ў Літву пастаянна прыбываюць палітычныя ўцекачы з Беларусі, шмат якія з іх на радзіме перажылі катаванні.

У сувязі з гэтым ён нагадаў, што Літва пачала расследаванні некалькіх справаў супраць беларускіх сілавікоў і заклікаў еўрапейскія краіны, заканадаўства якіх прадугледжвае прынцып універсальнай юрысдыкцыі, далучыцца да расследавання.

Кіраўнік МЗС Літвы пракаментаваў запыт Генпракуратуры Беларусі аб экстрадыцыі Ціханоўскай

АД, belsat.eu

Hавiны