Перакідванне расейскіх войскаў у Беларусь, план Ціханоўскай і прысуд лекару. Галоўнае за 21 студзеня
Belsat.eu падводзіць вынікі пятніцы, 21 студзеня.
Паводле інфармацыі Telegram-каналу беларускіх чыгуначнікаў belzhd_live, у Беларусь плануецца накіраваць 200 вайсковых эшалонаў з расейскай тэхнікай і жаўнерамі – гэта амаль у 7 разоў больш, чым падчас вучэнняў «Захад-2021». З 16 па 21 студзеня на тэрыторыю Беларусь для ўдзелу ў манеўрах «Саюзная рашучасць» ужо прыбыла 33 вайсковых эшалона з Расеі. Тым часам расейскія медыі паведамляюць, што пачалася перадыслакацыя ў Беларусь з Дальняга Усходу расейскіх зенітна-ракетных комплексаў С-400.
Аляксандр Лукашэнка наведаў вайсковыя аб’екты ў Лунінецкім раёне і правёў нараду з армейскім кіраўніцтвам, падчас якой зрабіў шэраг рэзкіх антыўкраінскіх заяваў і загадаў «надзейна абараніць» мяжу з Украінай, «каб нас не маглі заспець знянацку». Лукашэнка падкрэсліў, што не Беларусь і Расея не хочуць вайны, але адначасова прыгразіў Захаду «ламануць так, што мала не здасца».
Святлана Ціханоўская выступіла з заклікам да беларусаў узяць удзел у галасаванні на рэферэндуме па новай Канстытуцыі і сапсаваць бюлетэні. Яна патлумачыла, што такія дзеянні – адзіны легальны спосаб выказаць кожнаму сваё стаўленне да сістэмы Лукашэнкі. Ціханоўская таксама распавяла, што на перыяд кампаніі ствараецца аператыўны штаб дэмакратычных сілаў, куды ўвойдуць палітычныя структуры і грамадзянскія ініцыятывы.
У Горадні палітзняволенага неўролага Аляксандра Цялегу пакаралі 4 гадамі калоніі за 32 негатыўныя каментары ў дачыненні да чыноўнікаў і сілавікоў, у тым ліку супрацоўнікаў АМАПу, ГУБАЗіКу, суддзі і генпракурора. На працэсе стала вядома, што адзін з пацярпелых па справе збіваў Цялегу пры затрыманні.
Праваабаронцам стала вядома, што на палітвязня Паўла Вінаградава ў жодзінскай турме аказваецца ціск з боку адміністрацыі: яго паставілі на прафілактычны ўлік як «схільнага да экстрэмізму і іншай дэструктыўнай дзейнасці», а таксама на яго ўжо склалі некалі рапартаў за «парушэнне правілаў унутранага распарадку».
Палітзняволены працаўнік БМЗ Дзмітрый Елісееў, які быў затрыманы па справе «Рабочага руху», выйшаў на волю з гомельскага СІЗА: яму змянілі меру стрымання і выпусцілі пад заклад. Таксама выйшла на свабоду дырэктарка «Геному» Дар’я Царык – яна цалкам адбыла 8 содняў адміністратыўнага арышту.
Літоўская чыгунка атрымала запыт ад трох беларускіх кампаніяў на транспартаванне ўгнаенняў «Беларуськалія». Але гэтыя кантракты спачатку праверыць спецыяльная ўрадавая камісія, якая мусіць вырашыць, ці пагражаюць транзітныя здзелкі з беларускімі кампаніямі нацыянальным інтарэсам. Раней Раней кіраўнік Камітэту нацыянальнай бяспекі і абароны Сейму Літвы Лаўрынас Кашчунас заяўляў, што шанцы абысці забарону на транзіт беларускіх угнаенняў у Літве амаль нулявыя.
РР belsat.eu
