«Трагедыя на Нямізе» назаўсёды засталася ва ўспамінах беларусаў. 30 траўня 1999 года на беразе Свіслачы каля Палацу спорту быў зарганізаваны фестываль піва, падчас якога адбыўся канцэрт гурта «Манга-Манга». Раптам пачалася навальніца з залеваю і градам. Натоўп 2,5 тысячаў людзей кінуўся ў адзіны ў раёне Нямігі падземны пераход, які адначасова ёсць і ўваходам у станцыю метро. Паніка стварыла страшную цісканіну.
У выніку за 10 хвілінаў загінулі 53 асобы, большасць з якіх – маладзёны векам 14–20 гадоў. Сярод ахвяраў былі 40 дзяўчат і 2 міліцыянты, якія спрабавалі ўратаваць людзей.
{movie}«Эфект натоўпу»: з трагедыі на Нямізе мінула 15 гадоў |right|16740{/movie}
У падземным пераходзе ўзнікла «сцяна плачу», дзе родныя і сябры загінулых ставілі знічы, пісалі імёны, вешалі здымкі і тэксты малітваў. Пазней на месцы сцяны паўстаў мемарыял у выглядзе раскіданых на прыступках бронзавых ружаў. Пра яшчэ адзін помнік ахвярам у Чыжоўцы, дзе пахаваныя 11 асобаў, улады забыліся. Паводле бацькоў адной з загінулых, там зрабілі арку з імёнамі. Цяпер ёй трэба рамонт, аднак выканкам дапамагаць адмаўляецца: маўляў, гэта не комплекс, не помнік, каб рамантаваць за кошт дзяржавы.
Вінаватых у смерці 53 асобаў не знайшлі. Па выніках расследавання была пададзеная першая ў гісторыі суверэннае Беларусі грамадзянская позва, па якой мусіла была адказваць дзяржава. Аднак суд не падтрымаў пазаўнікоў, і пацярпелыя засталіся ні з чым. Паводле афіцыйнае версіі, прычынаю катастрофы стаў трагічны збег абставінаў.
Сваякі пацярпелых кажуць, што «ўрокаў з тых падзеяў не засвоілі». Бацькі ахвяраў сёння прыйшлі на месца трагедыі. У часе ўскладання кветак маці аднаго з загінулых упала на тых жа прыступках і моцна пашкодзілася. «Хуткую» давялося чакаць з паўгадзіны.
{movie}«Эфект натоўпу»: з трагедыі на Нямізе мінула 15 гадоў |right|16740{/movie}
ДР, belsat.eu