Рэферэндум па Канстытуцыі мусіць адбыцца ў Беларусі ў лютым 2022 году. Дэмакратычныя сілы прапаноўваюць беларусам прыйсці на ўчасткі і зрабіць свае бюлетэні несапраўднымі.
Сутнасць стратэгіі дзеянняў падчас канстытуцыйнага рэферэндуму, якую выпрацавалі дэмакратычныя сілы – ператварыць рэферэндум у «вота недаверу» рэжыму. Беларусаў заклікаюць прыходзіць на ўчасткі і рабіць наступным чынам:
1) У дзень галасавання прыйсці на выбарчыя ўчасткі.
2) Паставіць крыжыкі насупраць усіх прапанаваных у бюлетэні варыянтаў.
3) Апусціць бюлетэнь у скрыню для галасавання.
Стратэгію распрацавалі ініцыятывы «Честные люди», Zubr, платформа «Голос» з удзелам Офісу Святланы Ціханоўскай, Народнага антыкрызіснага ўпраўлення і Каардынацыйнай рады.
«Год таму мы патрабавалі новых выбараў. Замест гэтага нам прапаноўваюць рэферэндум, які не дае выбару. На самой справе гэта не рэферэндум па Канстытуцыі, а рэферэндум аб недаверы Лукашэнку. Калі вы не згодныя з беззаконнем, якое захлынула нашую краіну, давайце зробім рэферэндум несапраўдным, – звярнулася Святлана Ціханоўская да беларусаў. – Няважна, якія пытанні там будуць. Так, мы разумеем, што гэты рэферэндум – фікцыя, закліканая ўсіх падмануць. Але мы не можам яго праігнараваць. Таму дэмакратычныя сілы выпрацавалі агульны падыход да дзеяння».
Дэмакратычныя сілы лічаць, што байкот рэферэндуму нічога не прынясе.
«Байкот – таксама не выйсце. Байкот на руку існай сістэме, – лічыць лідарка ініцыятывы «Честные люди» Алена Жываглод. – Пасіўныя, расчараваныя грамадзяне, якія не ўдзельнічаюць у палітыцы – гэта тое, чаго рэжым дамагаецца рэпрэсіямі».
ГГ belsat.eu