У Беларусі паменела візавых цэнтраў, дзе можна падаць дакументы на польскую гуманітарную візу. Жыхарам Менску, Гомля і Магілёва цяпер можна звяртацца альбо адразу ў амбасаду Польшчы, альбо ў візавыя цэнтры ў Берасцейскай вобласці, паведамляе «Зеркало».
Візавыя цэнтры ў Менску, Гомлі і Магілёве прыпынілі прыём дакументаў на польскую гуманітарную візу. У консульскім аддзеле амбасады Польшчы тлумачаць гэта пастановай свайго Міністэрства замежных справаў.
«Тут каментаваць складана, але ў нас скарачаецца колькасць дыпламатаў, працаўнікоў, таму крыху памяншаецца і колькасць дакументаў, што мы прымаем», – кажуць у амбасадзе.
Цяпер жыхары Менску, Гомля і Магілёва могуць звяртацца ў консульскі аддзел праз электронную пошту. Каб атрымаць гуманітарную візу, трэба мець дакументы, якія пацвярджаюць факт рэпрэсіяў. Калі такіх дакументаў няма, застаецца магчымасць звярнуцца ў візавыя цэнтры ў Берасці, Баранавічах і Пінску, адзначылі ў амбасадзе Польшчы.
Паводле апошніх звестак, цяпер у Польшчы жывуць амаль 60 тысяч беларусаў, што маюць дзейны дакумент, які дае права перабываць у краіне, – гэта, напрыклад, від на жыхарства. З жніўня 2020 года грамадзяне Беларусі атрымалі крыху менш за 40 тысяч гуманітарных візаў і больш за 53 тысячы візаў паводле праграмы «Poland.Business Harbour» для рэлакацыі айцішнікаў.
Сяргей Крот belsat.eu