Падыходзіць да заканчэння чарговы дзень няспыннага пратэсту беларусаў супраць фальсіфікацыі выбараў ды гвалту сілавікоў. Падводзім вынікі 20 кастрычніка.
Рэпрэсіі журналістаў і грамадства
Раніца пачалася з таго, што сілавікі прыйшлі ў рэдакцыю выдання «Новы Час». Ператрусы прайшлі ў офіс і ўдома ў намесніка галоўнага рэдактара Сяргея Пульшы. Галоўную рэдактарку Аксану Колб даставілі ў Следчы камітэт, але пасля адпусцілі.
Напярэдадні ператрус прайшоў у фатографа «Новага Часу» Дзмітрыя Дзмітрыева.
У Крычаве ж паўторна затрымалі пасля суду, які накіраваў справу на дапрацоўку, журналіста Сяргея Няроўнага.
Перазатрымалі і студэнтку Сафію Маргунову, якую арыштавалі за спробу трапіць на апеляцыю ў «справе студэнтаў».
Таксама ператрус прайшоў у бабруйскім тайм-клубе «1387». На некаторы час была затрыманая ягоная дырэктарка Наталля Халанская.
А ўвечары стала вядома, што Міністэрства інфармацыі заблакавала навінны партал Telegraf.by, які дзейнічаў 2005 года. Нібыта за пагрозы нацыянальнай бяспецы.
Між тым «Комсомольская правда» будзе прасіць КДБ адпусціць журналіста Генадзя Мажэйку пад любы заклад, заявіў галоўны рэдактар «Комсомольской правды» Уладзімір Сунгоркін.
Міжнародны ціск
Тым часам міжнародны ціск на беларускі рэжым не спыняецца. Гэтак, у амерыканскім Нью-Ёрку на патрабаванне ўладаў ЗША зачынілася Генеральнае консульства Беларусі.
Міністэрства замежных справаў Літвы ўручыла дыпламатычную ноту пратэсту прадстаўніку амбасады Беларусі ў Вільні з нагоды перасячэння літоўскай мяжы беларускім памежнікам.
А міністр унутраных спраў Нямеччыны Горст Зээгофэр заявіў, што ўрад ягонай краіны перакананы, што ключ да вырашэння праблемы прытоку нелегальных мігрантаў у Еўразвяз праз Беларусь ляжыць у Маскве.
Тая ж у сваю чаргу падпісала дакументы аб падаўжэнні тэрмінаў дзеяння пагадненняў аб размяшчэнні ў Беларусі двух вайсковых аб’ектаў Расеі – вузла сістэмы папярэджання аб ракетным нападзе ў Баранавічах і радыёстанцыі вайскова-марскога флоту ў Вялейцы. І рыхтуе новую вайсковую дактрыну Саюзнай дзяржавы.
МГ belsat.eu
