Мастак Дэ Лёс разам з belsat.eu узгадвае самыя рэзанансныя і абсурдныя падзеі апошніх дзён.
Марыі Калеснікавай і Максіму Знаку прысудзілі 11 і 10 гадоў пазбаўлення волі адпаведна. Іх прызналі вінаватымі ў змове з мэтай захопу дзяржаўнай улады неканстытуцыйным шляхам (ч. 1 арт. 357 КК), стварэнні экстрэмісцкага фармавання і кіраванні ім (ч. 1 арт. 361-1 КК), а таксама ў закліках да дзеянняў, накіраваных на прычыненне шкоды нацыянальнай бяспецы (ч. 3 арт. 361 КК).
Пасля двух з паловаю гадоў перамоваў аб «паглыбленай інтэграцыі» Беларусі і Расеі 9 верасня ў Крамлі Аляксандр Лукашэнка і Уладзімір Пуцін абвесцілі ўзгадненне ўсіх інтэграцыйных праграмаў.
Газета «Мінская праўда», адзін з заснавальнікаў якога – Менскі аблвыканкам, выйшла 7 верасня з карыкатурай на каталіцкіх святароў на галоўнай старонцы. У Каталіцкім касцёле гумару не ацанілі.
У Беларусі, як і ўва ўсім свеце, пачалася чарговая хваля каронавіруса. Але яшчэ большаю праблемаю для грамадзянаў нашай краіны сталася тое, што ў шпіталях востра адчуваецца нястача дактароў. Яшчэ летам медыі пісалі, што ў медычных установах дэфіцыт больш за 10 тысяч медыкаў. Цяпер, калі людзі вымушаныя больш звяртацца ў больніцы, гэта стала моцна адчувальным.
17 верасня на рашэнне ўладаў у Беларусі ўпершыню адзначылі новае свята – Дзень народнага адзінства. Як у Беларусі адзначаць гэтак званы Дзень народнага адзінства? Патаемная імпрэза ў Менску, прымусовыя забегі і новая плошча.
15 верасня дзяржаўнае тэлебачанне паведаміла, што Лукашэнка напярэдадні гэтак званага Дня народнага адзінства падпісаў указ аб памілаванні 13 асуджаных. Намесніца кіраўніка адміністрацыі Лукашэнкі Вольга Чупрыс распавяла ў эфіры «Беларусь 1», што большасць памілаваных «здзейснілі злачынствы праз інтэрнэт і шчыра раскайваліся». Але былі асуджаныя за хуліганства або ўдзел у масавых беспарадках. У дзевяці з трынаццаці памілаваных ёсць няпоўнагадовыя дзеці. Праваабаронцы лічаць такі пераслед палітычна матываваным і наагул заклікаюць скасаваць крымінальныя артыкулы за абразу дзяржавы, дзяржаўнай сімволікі і службовых асобаў.
Малюнкі Дэ Лёс belsat.eu