Дырэктар Дэпартаменту авіяцыі Міністэрства транспарту і камунікацыяў Арцём Сікорскі выступіў з заявай, у якой назваў справаздачу Міжнароднай арганізацыі грамадзянскай авіяцыі (ICAO) аб інцыдэнце з рэйсам «Ryanair» непрымальнай, піша БелТА. 19 ліпеня ICAO апублікавала даклад аб пасадцы самалёта «Ryanair» у Менску ў траўні 2021 года. У дакуменце захады беларускіх чыноўнікаў асудзілі.
Міжнародная арганізацыя грамадзянскай авіяцыі 19 ліпеня апублікавала даклад аб пасадцы самалёта «Ryanair» у Менску ў траўні мінулага года. У выніку прымусовай пасадкі самалёта з рэйсу знялі і арыштавалі блогера Рамана Пратасевіча і Соф’ю Сапегу. У Менску адрэагавалі на гэты дакумент.
«Гэты даклад не вытрымлівае ніякай крытыкі. Ён катэгарычна непрымальны і дыскрэдытуе ICAO як міжнародны тэхнічны орган, які займаецца грамадзянскай авіяцыяй. Мы катэгарычна з ім не пагадзіліся. Афіцыйны прадстаўнік РФ, сябра Рады ICAO, таксама не пагадзіўся з гэтай справаздачай, указаў на шэраг памылак, недакладнасцяў, неавіяцыйных, неаб’ектыўных падыходаў. Ва ўсіх дакументах ICAO напісана, што любое расследаванне ладзіцца не для таго, каб знайсці вінаватых, а каб выключыць падобныя падзеі ў будучыні. А цяпер пагрозу авіяцыйнай бяспецы ўяўляе так званы тэлефонны экстрэмізм, і гэта абʼектыўная праблема, якой ICAO павінна займацца», – заявіў Арцём Сікорскі дырэктар Дэпартаменту авіяцыі Міністэрства транспарту і камунікацыяў.
23 траўня 2021 года ў Менску зрабіў вымушаную пасадку самалёт «Ryanair», які выконваў рэйс Афіны – Вільня. Прызямленне было справакаванае беларускімі спецслужбамі – нібыта на борце была бомба – дзеля затрымання апазіцыйнага блогера Рамана Пратасевіча, які быў у вышуку ў Беларусі і ляцеў гэтым рэйсам. Разам з ім затрымалі ягоную дзяўчыну Соф’ю Сапегу.
Інцыдэнт з рэйсам «Ryanair» выклікаў міжнародны скандал: палітыкі, дыпламаты і міжнародныя арганізацыі рэзка асудзілі дзеянні рэжыму Лукашэнкі. Еўразвяз закрыў паветраную прастору для «Белавіі», а заходнія авіякампаніі адмовіліся ад палётаў над Беларуссю.
Алена Аляксандрава belsat.eu
