«Жыве Беларусь!» ЗША паабяцалі «нязменнае падтрыманне дэмакратычных памкненняў беларускага народу»
Прэс-сакратар Дзяржаўнага дэпартаменту ЗША Нэд Прайс выступіў з заявай з нагоды сустрэчы амерыканскага кіраўніцтва са Святланай Ціханоўскай.
Прайс адзначыў, што дзяржсакратар ЗША Энтані Блінкен, намеснік дзяржсакратара ў палітычных пытаннях Віктор’я Нулэнд і дарадца Дзярждэпартаменту Дэрэк Шале абмеркавалі з лідаркай беларускай апазіцыі «неабходнасць спынення рэжымам Лукашэнкі рэпрэсіяў, безумоўнага вызвалення ўсіх палітвязняў, інклюзіўнага палітычнага дыялогу і новых прэзідэнцкіх выбараў пад міжнародным назіраннем».
«Яны таксама падкрэслілі нязменнае падтрыманне з боку ЗША дэмакратычных памкненняў беларускага народу», – паведаміў прэс-сакратар.
«Мы абмеркавалі выхад з палітычнага крызісу: вызваленне ўсіх палітвязняў, інклюзіўны дыялог і новыя выбары. Жыве Беларусь!» – напісаў у сваім Twitter Энтані Блінкен.
Нагадаем, што падчас перамоваў Святлана Ціханоўская заклікала ЗША:
- прыняць пакет экстранай дапамогі для беларускіх незалежных СМІ, тэлеграм-каналаў, YouTube-праектаў, журналісцкіх расследаванняў;
- пашырыць дапамогу грамадзянскай супольнасці, прыватнаму бізнесу ў Беларусі, палітвязням і іхным сем’ям;
- павялічыць колькасць стыпендыяльных праграмаў для студэнтаў і даследнікаў;
- даць сігнал Расеі, што падпісаныя з рэжымам кантракты і пагадненні не будуць прызнаныя юрыдычна і анулююцца;
- узмацніць разам з партнёрамі палітычны і эканамічны ціск на рэжым;
- надаць дыпламатычнае падтрыманне беларускім дэмакратычным сілам у іншых краінах;
- узяць актыўны ўдзел у арганізацыі і правядзенні канферэнцыі высокага ўзроўню для пераадолення крызісу ў Беларусі.
МГ belsat.eu
