Кожны дзень у Беларусі праходзяць суды, затрыманні ці заводзяць новыя палітычныя крымінальныя справы. Распавядаем пра рэпрэсіі, пра якія стала вядома 20 траўня.
– Сёння суддзя Міхаіл Макарэвіч разгледзеў на закрытым паседжанні скаргі Эдуарда Бабарыка і яго адваката на падаўжэнне тэрміну ўтрымання пад вартай. У вызваленні з-пад варты адмоўлена, Эдуард застаецца ў зняволенні. Адвакат падаў скаргу ў вышэйшую інстанцыю, скаргу разгледзяць на наступным тыдні. Эдуард бесперапынна ўтрымліваецца пад вартай ужо больш за 23 месяцы.
– Прамысловага альпініста з Магілёўскай вобласці затрымалі за рэгістрацыю ў плане «Перамога». Паўлу Якімюку інкрымінаваны артыкул 361-1 КК Беларусі («удзел у экстрэмісцкім фарміраванні»).
– Праваабаронцы Беларусі 20 траўня прызналі палітзняволенымі яшчэ траіх чалавек. Гэта Дзмітрый Кандраценка, Аляксандр Лучыновіч і Павел Наздра. Іх абвінавачваюць у спрыянні экстрэмісцкай дзейнасці, а затрымалі за перадачу інфармацыі аб расейскай вайсковай тэхніцы незалежнаму тэлеграм-каналу.
– ГУБАЗіК затрымаў настаўніка гісторыі лінгвістычна-гуманітарнага каледжа. 31-гадовага Андрэя Дараховіча сілавікі вінавацяць ва ўдзеле ў пратэстах і «уцягванні ў іх малалетніх дзяцей» і запісалі з мужчынам пакаяльнае відэа. Андрэй мае жонку і двух непаўналетніх дзяцей.
– За імправізаванае пахаванне Лукашэнкі да 4.5 гадоў пазбаўлення волі. У судзе Віцебскага раёну завяршыўся судовы працэс над палітвязнямі Ірынай Пярцовай, Арцёмам Латышавым, Кацярынай Макарэвіч і Юліяй Лабуновай. Ім прысудзілі ад 2 да 4,5 гадоў пазбаўлення волі. Усе былі затрыманыя ў верасні 2021 года, і 7 месяцаў да суда правялі ў Віцебскім СІЗА. Іх судзілі паводле трох артыкулах Крымінальнага кодэксу Рэспублікі Беларусь: ч.2 арт. 339; ч.1 арт. 342; арт. 341.
– У Наваполацку на закрытым пасяджэнні вынесены прысуд Міхаілу Лабаню. Яго абвінавацілі ў паклёпе ў дачыненні да Лукашэнкі, абразе Лукашэнкі і абразе прадстаўніка ўлады. Суддзя Віталь Лапко прызнаў яго вінаватым і асудзіў да 4 гадоў пазбаўлення волі ў калоніі агульнага рэжыму і штрафу ў памеры 100 базавых велічынь.
– «Честная газета» прызнана «экстрэмісцкім фарміраваннем». Гэта штотыднёвае выданне пра навіны беларускага пратэсту, арыентаванае на аўдыторыю, якая мала карыстаецца інтэрнэт рэсурсамі.
Алена Рувіна belsat.eu
