Прэзідэнт Польшчы ў інтэрв’ю Польскаму прэсаваму агенцтву падзяліўся меркаваннем пра магчымую інтэрвенцыю Расеі і прагнозам адносна заканчэння вайны ва Украіне. Палітык адзначыў, што лічыць напад Расеі на Польшчу малаімаверным, і выказаў спадзяванне, што Украіна з дапамогай саюзнікаў зможа вызваліць акупаваныя раней тэрыторыі.
Анджэй Дуда назваў напад Расеі малаімаверным, бо агрэсія супраць аднаго чальца NATO прывядзе да вайны з усім Альянсам.
«Вядома, патэнцыйная пагроза ўсё яшчэ існуе. Але варта адзначыць, што ў Польшчы больш за 10 тысяч салдатаў найбуйнейшага войска свету – самага магутнага, самага лепшага і з самым сучасным узбраеннем. Гэтыя вайскоўцы маюць досвед баявых дзеянняў. У нас таксама ёсць амерыканская інфраструктура, цяжкае ўзбраенне, СПА. Частка тэрыторыі Польшчы ўжо абароненая амерыканскімі сістэмамі «Patriot», – адзначыў Анджэй Дуда.
Таксама палітык дадаў аптымістычны прагноз адносна заканчэння вайны ва Украіне і запэўніў суседнюю краіну ў падтрыманні.
«Я хацеў бы, каб вайна скончылася тым, што Украіна верне ўсе свае тэрыторыі ў міжнародна прызнаных межах. Гэта вельмі важна для агульнай бяспекі Еўропы і для будучыні, бо ў палітычным значэнні гэта азначала б перамогу Украіны ў вайне», – заявіў Анджэй Дуда.
Нагадаем, што ідзе 86-ы дзень вайны ва Украіне. 24 лютага Уладзімір Пуцін абвесціў аб пачатку «спецыяльнай ваеннай аперацыі», мэтамі якой былі звяржэнне ўраду Украіны, захоп Кіева і дэмілітарызацыя краіны.
Раман Лугоўскі belsat.eu