Суддзя Маскоўскага раёну Берасця Яўген Брэган 20 траўня прызнаў вінаватым Уладзіміра Шурубейку ў абразе прадстаўніка ўлады (арт. 369 КК), паведамляе «Вясна».
Паводле следства, Шурубейка напісаў у «Viber»-чаце «Вычулкі.Ямна», паведамленне пра супрацоўніка органаў дзяржбяспекі Дзяніса Сямёнава, што той «с*ыкло, чмо і ныцік».
Следства перакананае, што Уладзімір зрабіў гэта «з мэтаю нашкодзіць аўтарытэту дзяржаўнай улады». Судова-лінгвістычная экспертыза ў крымінальнай справе заключыла, што выказванне Шурубейкі ў чаце ўтрымлівала негатыўную ацэнку асобы Сямёнава.
Дзяніс Сямёнаў ацаніў свае маральныя пакуты на 2500 рублёў, атрымаў ад асуджанага 1500 рублёў і заявіў, што прэтэнзіяў больш не мае.
Суддзя Брэган пакараў Уладзіміра Шурубейку двума гадамі абмежавання волі з накіраваннем у папраўчую ўстанову адкрытага тыпу. У тэрмін адбытага пакарання залічыць 3 дні, праведзеныя пад вартай, а таксама перыяд з 7 красавіка да 22 траўня пад хатнім арыштам.
МГМ, belsat.eu