Прэс-служба Міністэрства ўнутраных справаў Беларусі паведаміла пра пашырэнне спісу рэсурсаў, прызнаных экстрэмісцкімі.
Гэтак, 18 траўня рашэннем суда Цэнтральнага раёна Менску рэсурсы Вольгі Карач і Ігара Макара: тэлеграм-каналы «НАШ ДОМ», «НАШ ДОМ ТВ», «Игорь Макар | Официальный канал», а таксама youtube-каналы «НАШ ДОМ ТВ» и «Игорь Макар» былі ўнесеныя ў спіс забароненых. Падставай для гэтага сталі матэрыялы ГУБАЗіК МУС.
Адзначаецца, што ў відэароліках гэтых каналаў заклікалі да ўдзелу ў «несанкцыянаваных мітынгах, масавых беспарадках, у тым ліку па матывах палітычнай і ідэалагічнай варожасці, а таксама да захопу ўлады неканстытуцыйным шляхам і распальвання сацыяльнай варожасці паміж грамадзянамі Беларусі і прадстаўнікамі дзяржорганаў».
ГУБАЗіК заявіў таксама пра «заклікі да дзеянняў па дэстабілізацыі працы Цэнтрвыбаркаму, перашкаджэння законнай дзейнасці дзяржорганаў, а таксама абразлівыя каментары».
Цяпер за рэпост інфармацыі з гэтых інтэрнэт-рэсурсаў пагражаюць штраф або арышт.
МГ belsat.eu
