У сацсетках нядаўна распаўсюдзілі фота прыгожай украінскай вайскоўкі. Неўзабаве з’явіліся каментары пра тое, што бландзінка ў форме – падстаўная мадэль. «Белсат» праверыў, хто на фота.
Дзяўчына на фота апранутая ў форму ўзору мульцікам, у руках яна трымае амерыканскі пісталет-кулямёт «KRISS Vector». Фатографу яна ўсміхаецца з салону машыны хуткай дапамогі, а малая пяхотная рыдлёўка, якая стаіць побач, указвае на тое, што аўтамабіль выкарыстоўваецца ў цяжкіх умовах.
Падраздзяленне, у якім служыць дзяўчына, можна вызначыць паводле нашыўкі на плячы. Гэта ўкраінскі добраахвотніцкі медычны батальён «Гаспітальеры», які ўваходзіць у склад добраахвотніцкай арміі. Гаспітальеры ратуюць параненых жаўнераў проста на полі бою.
«Белсат» звязаўся з прадстаўніком батальёну, які паведаміў, што бландзінка са зброяй – стралок агнявога прыкрыцця адной з машынаў хуткай дапамогі.
«Гэта не фэйк, а ў батальёне ў нас шмат прыгожых дзяўчат. Бландзінку на фатаграфіі завуць Кіра. Дзеля ейнай бяспекі я не магу раскрыць, дзе яна цяпер служыць», – адказвае Андрэй Долік, які каардынуе ў Варшаве закуп і збор харчоў для «Гаспітальераў».
Спекуляцыі таксама развейвае афіцыйны допіс медычнага батальёну ў Facebook, у якім ратавальнікі просяць фінансавага падтрымання сваёй дзейнасці. Тут фотаздымак з жаўнеркай ужо размешчана з вадзяным знакам «Гаспітальераў». Яго гераіня падпісаная – гэта Кіра Нечай, якая не хавае ў Facebook месца сваёй службы.
Кіра працавала ў Камітэце Вярхоўнай Рады ў пытаннях процідзеяння і перадухілення карупцыі, была менеджарам праектаў у Цэнтры дэмакратыі і вяршэнства права. Да вайны дзяўчына захаплялася альпінізмам, пешым турызмам, стральбой, арыентацыяй на мясцовасці. Цяпер яна абараняе радзіму ад расейскага акупанта.
«Гэта – Кіра здаровага чалавека», – напісала пра яе сяброўка ў Twitter.
Украінскіх ратавальнікаў таксама можна падтрымаць праз польскі фонд, які супрацоўнічае з батальёнам. І тут таксама тварам збору стала ўзброеная парамедык.
ПЯ/ДР belsat.eu