Робяцца таксічнымі для іншых кампаніяў. Эканаміст патлумачыў, чым санкцыі ЗША пагражаюць дзяржпрадпрыемствам

Фота: ІА / Белсат

Аднаўленне санкцыяў ЗША супраць беларускай нафтахімічнай галіны можа паўплываць на жаданне кампаніяў з іншых краін супрацоўнічаць з дзяржпрадпрыемствамі Беларусі. Пра гэта ў каментары belsat.eu заявіў навуковы супрацоўнік Цэнтру эканамічных даследаванняў BEROC Алег Мазоль.

Эксперт адзначыў, што санкцыі, па-першае, будуць ускладняць працу беларускіх кампаніяў на рынку ЗША, а, па-другое, стануць сігналам для іншых контрагентаў, якія б хацелі супрацоўнічаць з гэтымі прадпрыемствамі.

«Паколькі санкцыі ўводзяць самыя ЗША, яны могуць увесці забароны на аперацыі з доларам і гэтак далей. Гэта стварае сігнал для іншых кампаніяў, якія б хацелі працаваць з беларускімі прадпрыемствамі. І ў гэтым самы галоўны ўдар. Не тое, што ім забароняць працаваць на амерыканскім рынку, хоць гэта і істотна адаб’ецца на іх эканамічных паказніках. Большы эфект усё ж ад таго, што яны робяцца таксічнымі для іншых контрагентаў», – заявіў Алег Мазоль.

Найперш з беларускімі кампаніямі нафтахімічнай галіны працавалі Вялікая Брытанія і Нідэрланды.

«Ускладненне працы на гэтых рынках і абмяжуе прыток дадатковых грашовых сродкаў», – падкрэсліў эканаміст.

Дзярждэп ЗША цалкам падтрымаў аднаўленне санкцыяў супраць беларускіх дзяржпрадпрыемстваў

19 красавіка Міністэрства фінансаў ЗША адклікала генеральную ліцэнзію, якая прыпыняла санкцыі ў дачыненні дзевяці беларускіх прадпрыемстваў.

Паводле пастановы Мінфіну ЗША з 3 чэрвеня 2021 ЗША аднаўляюць санкцыі ў дачыненні беларускіх прадпрыемстваў. У чорны спіс Злучаных Штатаў уключаныя «Беларускі Дом гандлю нафтай», «Белнафтахім», «Белнафтахім ЗША, Inc», ААТ «Белшына», ААТ «Горадня Азот», ААТ «Горадня Хімвалакно», ААТ «Лакафарба», ААТ «Нафтан», ААТ «Полацк Шкловалакно».

МГ belsat.eu

Hавiны