Берасцейскі абласны суд разгледзеў апеляцыйную скаргу палітзняволенай Вольгі Класкоўскай на вырак суда Маскоўскага раёну Берасця за абразу міліцыянта, паведамляе праваабарончы цэнтр «Вясна».
Абласны суд пакінуў вырак без зменаў, праз некалькі дзён Вольгу перавялі ў жаночую калонію № 4, дзе жанчына ўжо адбывала пакаранне да выстаўлення новага абвінавачання.
Вольга Класкоўская – былая журналістка газеты «Народная воля». Жанчыну затрымалі 14 кастрычніка 2020 года ў Менску, яе абвінавацілі ў перакрыцці руху транспарту на скрыжаванні праспекту Ракасоўскага і вуліцы Пляханава ўвечары 13 кастрычніка 2020 года. Акцыю ладзілі прыблізна 7 чалавек, сярод якіх нібыта была і Вольга Класкоўская.
Вользе паставілі ў віну здзяйсненне злачынства, прадугледжанага арт. 342 Крымінальнага кодэксу Беларусі («Арганізацыя групавых дзеянняў, што груба парушаюць грамадскі парадак і пацягнулі парушэнне працы транспарту»). Суд пакараў жанчыну двума гадамі калоніі.
У канцы лістапада 2021 года Вольгу этапавалі з гомельскай жаночай калоніі ў берасцейскі СІЗА № 7 для правядзення следчых дзеянняў паводле новай крымінальнай справы, паводле арт. 369 КК («Абраза прадстаўніка ўлады»), за каментар у сацыяльных сетках, у якім Вольга нібыта абразіла міліцыянта з Берасця. Гэты каментар быў размешчаны яшчэ да ейнага арышту.
Разгляд новай справы супраць Вольгі распачаўся ў судзе Маскоўскага раёну Берасця 19 студзеня 2022 года. У працэсе палітзняволеная браць удзел адмовілася, бо «суд незаконны і несправядлівы», і са словамі «Жыве Беларусь» пакінула паседжанне. 20 студзеня 2022 года суддзя Марыя Аліферук прысудзіла Вользе 1,5 года хатняй «хіміі». Шляхам складання тэрмінаў Класкоўскай прызначылі 2 гады і 6 месяцаў калоніі агульнага рэжыму.
На спатканні з маці Вольга распавяла, што ёй не далі належным чынам азнаёміцца з матэрыяламі справы: следчы даў толькі пару гадзінаў перад судом. Вольга лічыць, што гэтым былі парушаныя ейныя працэсуальныя правы. Свой прысуд Класкоўская слухала седзячы, а пачуўшы яго, звярнулася да суддзі са словамі: «Як вам не сорамна? Гэты рэжым хутка абрынецца! Жыве Беларусь!»
Берасцейскі абласны суд 14 сакавіка 2022 года разглядзеў апеляцыйную скаргу Вольгі Класкоўскай і пакінуў прысуд без зменаў. Палітзняволеную вярнулі ў жаночую калонію ў Гомлі.
ГГ, belsat.eu