Былы прэм’ер-міністр Беларусі Сяргей Румас вылучаны кандыдатам у назіральную раду Рассельгасбанка. Пра гэта паведамляе TUT.by.
Распараджэнне расейскага ўрада, у якім зацверджаны спіс кандыдатаў, прэмʼер-міністр РФ Міхаіл Мішусцін падпісаў 18 сакавіка. Адным з кандыдатаў зʼяўляецца Сяргей Румас.
Паводле інфармацыі TUT.BY, экс-прэмʼера Беларусі ўнеслі ў спіс кандыдатаў у назіральную раду Рассельгасбанка яшчэ ў канцы 2020 года. Ён на той момант дэ-юрэ кіраваў назіральнай радай МТЗ. Аднак у студзені 2021 годзе савет міністраў зацвердзіў прадстаўніком дзяржавы ў органах кіравання трактарнага заводу віцэ-прэмʼера Юрыя Назарава.
Рассельгасбанк – гэта расейскі дзяржаўны банк, найбуйнейшы крэдытор аграпрамысловага комплексу Расеі. Назіральную раду банку ўзначальвае міністр сельскай гаспадаркі РФ Дзмітрый Патрушаў, які зʼяўляецца старэйшым сынам сакратара Савета бяспекі Расеі, экс-дырэктара ФСБ Мікалая Патрушава.
Сяргей Румас займаў пасаду прэмʼер-міністра Беларусі са жніўня 2018 па чэрвень 2020 года. У лютым 2021 года стала вядома пра затрыманне шэрагу сяброў і паплечнікаў Румаса ў межах крымінальнай справы аб ільготным фінансаванні «Белаграпрамбанкам» шэрагу прадпрыемстваў. Хадзілі чуткі, што сілавікі таксама маюць прэтэнзіі і да экс-прэм’ера, аднак ён на той момант знаходзіўся ў Лондане. У размове з журналістамі Румас тады заявіў: ён не ўпэўнены, што гэта мэтанакіраваная атака менавіта на яго.
ІІ belsat.eu