Акцыі пратэсту працягваюцца з 9 жніўня мінулага году. Ужо 224-ы дні грамадзяне нашай краіны патрабуюць спыніць гвалт, пакараць адказных за бязмежжа і фальсіфікацыі. Чым яшчэ адметны дзень – у аглядзе «Белсату».
У жніўні 2020-га беларускія сілавікі ўпершыню стралялі ў пратэстоўцаў. Агнястрэльную зброю выкарыстоўвалі рэдка (хаця менавіта з яе быў забіты Генадзь Шутаў), аднак і траўматычныя патроны могуць прывесці чалавека ў труну. У нядаўнім дакладзе BYPOL і ISANS прысутнічаў траўматычны пісталет «Аса», які стаіць на ўзбраенні ў МУС. Выявілася, што ягоныя дэталі вырабляе беларускі завод. А купляюць яго, хутчэй за ўсё, у Расеі.
«Аса» можа быць небяспечнай, як і любая траўматычная зброя, як то было ў выпадку з забітым Аляксандрам Тарайкоўскім. Эксперт Ягор Лебядок адзначае, што цяжкія наступствы можа выклікаць пападанне кулі ў сонную артэрыю. Тое ж самае тычыцца нырак і печані, калі ў чалавека ёсць з імі праблемы.
Вядомыя і выпадкі смерці ад «Асы». Гэтак, у 2010 годзе наведвальнік маскоўскай крамы забіў ейнага ахоўніка стрэлам у вока. За два гады да таго п’яны баксёр зборнай Расеі Раман Раманчук пасварыўся са сваім прыяцелем ва Уладзівастоку і стрэліў яму ў вока – хлопец сканаў. Вінаватай зноў была «Аса».
Спецыяльны дакладчык па пытанні аб становішчы праваабаронцаў Мэры Лолар заявіла аб сваёй занепакоенасці, выкліканай узмацненнем ціску на праваабаронцаў у Беларусі.
Як адзначае Лолар, ператрусы ў офісах, арышты праваабаронцаў і перашкода працы адвакатаў сталі агульнай практыкай. «Некаторыя прыцягваюцца да крымінальнай адказнасці за супрацу з ААН і падвяргаюцца жорсткаму абыходжанню падчас утрымання пад вартай», – кажа спецдакладчыца.
Тым часам праваабаронца Марфа Рабкова застанецца пад вартай да 17 чэрвеня. Ёй працягнулі тэрмін утрымання пад вартай на тры месяцы, паведамляе «Вясна».
Каардынатарка валанцёрскай службы праваабарончага цэнтру «Вясна» Марфа Рабкова больш за 6 месяцаў знаходзіцца ў СІЗА № 1 на Валадарскага. Следчыя працягнулі ёй тэрмін утрымання пад вартай на тры месяцы. Яна застанецца за кратамі да 17 чэрвеня, гэта будзе 9 месяцаў з дня затрымання.
У Берасці суд Ленінскага раёну прызнаў два рэсурсы ў Telegram экстрэмісцкімі матэрыяламі. Справу ў судзе разглядалі з ініцыятывы мясцовага ГУБАЗіК. Экстрэмісцкімі прызнаныя канал «Берасце: Чуткі і факты» і чат «Берасце 97 %». Цяпер публікаванне (рэпост) інфармацыі з гэтых суполак цяпер за сабою адміністрацыйную адказнасць паводле арт. 19.11 КаАП.
Акрамя таго, у сакавіку, як паведамляе МІнінфармацыі, экстрэмісцкімі сталі Telegram-чат «Мазыр 97 %», «Гомель Савецкі 97», Telegram-канал «Кіроўцы 97» і Telegram-група «Рэчыца для Жыцця ЧАТ». Раней у 2020 годзе экстрэмісцкімі прызналі каналы «NEXTA», «NEXTA Live» і «LUXTA», а таксама лагатып «NEXTA».
Экс-кіраўнік «Белгазпрамбанку» Віктар Бабарыка здолеў перадаць з СІЗА адказы на пытанні для РБК, у якіх распавёў пра сваё бачанне на існы палітычны крызіс у Беларусі.
Віктар Бабарыка распавёў, што сцверджанні ўладаў Беларусі пра нібыта вонкавую пагрозу для краіны і ратаванне незалежнасці з’яўляюцца няпраўдай. Былы банкір і палітык кажа, што кіраўніцтва краіны ратавала «ўласную ўладу ад людзей, якія хацелі б змяніць жыццё да лепшага, і дзеля гэтага гатовае было выкарыстоўваць нават прыцягненне вонкавых узброеных сілаў».
Пры гэтым Віктар Бабарыка выказвае меркаванне, што захаваць сапраўдную незалежнасць краіны не ўдалося.
«Як і ў любога чалавека, у дзяржавы незалежнасць абапіраецца на эканоміку. Калі не можаш забяспечыць сам сябе, а бярэш сродкі на сваё ўтрыманне ў бацькоў, сваякоў ці сяброў, то казаць пра незалежнасць складана», – выказвае меркаванне Віктар Бабарыка.
СК belsat.eu