Статыстыка сведчыць, што за апошнія 13 гадоў колькасць абортаў скарацілася на 77 %. Да 2003 года беларускія жанчыны рабілі аборты часцей, чымся нараджалі. У Міністэрстве аховы здароўя звязваюць паляпшэнне гэтых паказчыкаў з актыўнай прапагандаю супраць перарывання цяжарнасці ды з’яўленнем новых сродкаў кантрацэпцыі.
Прынятыя Палатаю прадстаўнікоў у другім чытанні папраўкі да закону аб ахове здароўя дазваляюць доктару-спецыялісту адмовіцца рабіць аборт. Дзеля гэтага доктар мусіць у пісьмовым выглядзе паведаміць аб сваім рашэнні кіраўніку медычнай установы. На апошняга ўскладаецца абавязак знайсці доктара, які зробіць аборт. У парламенце запэўніваюць, што дактары, якія пагаджаюцца рабіць аборты, не будуць атрымліваць за гэта нейкіх дадатковых надбавак.
Старшыня камісіі Палаты прадстаўнікоў у ахове здароўя паведаміў, што толькі 21 % абортаў датычыць выпадкаў, калі на гэта ёсць медычныя рэкамендацыі.
Выпадкі стэрылізацыі мужчынаў у Беларусі застаюцца адзінкавыя, хоць гэта адзін з самых надзейных метадаў кантрацэпцыі.
Папраўкі ў заканадаўства ўводзяць узроставы цэнз на працэдуру: добраахвотную стэрылізацыю могуць выканаць толькі мужчыны, старэйшыя за 35 гадоў, або тыя, хто ўжо мае дваіх і больш дзяцей.
МЛ, belsat.eu