Украінскія спецслужбы схапілі прадстаўніка сепаратысцкага ўраду
Ігара Какідзянава арыштавалі пад Марыупалем і на вачах журналістаў праз Харкаўскі аэрапорт адправілі на час следства ў адзін з ізалятараў паўночнай Украіны. Яго падазраюць у замаху на забойства ды іншых злачынствах, паведамляюць украінскія інфармацыйныя агенцтвы.
Тым часам у Данецку раздаюць бланкі для галасавання на сепаратысцкім рэферэндуме.
Нягледзячы на параду Уладзіміра Пуціна адкласці рэферэндум на нявызначаны час, сепаратысты надалей працягваюць «агітацыйную кампанію».
Мясцовы тэлеканал пускае бягучы радок з заклікам прыняць удзел у рэферэндуме 11 траўня. А замест садраных сепаратыстамі рэкламных плакатаў на гарадскіх сіці-лайтах і білбордах прыхільнікі «Данецкай народнай рэспублікі» павесілі рэкламу свайго рэферэндуму.