Лідарка дэмакратычных сілаў Беларусі Святлана Ціханоўская завяршыла візіт у Прагу, дзе прыняла ўдзел у адкрыцці міжнароднай канферэнцыі з нагоды гадавіны Аксамітнай рэвалюцыі. На канферэнцыі Ціханоўская адзначыла, што беларусам трэба дапамагаць візамі, стыпендыямі, аказваць матэрыяльную падтрымку грамадзянскай супольнасці і беларускім добраахвотнікам.
На наступны навучальны год Чэхія гатова вылучыць 10 стыпендый беларускім студэнтам-палітвязням, якія вызваляцца з турмаў. Раней урады Чэхіі выключылі з візавага «бана» беларускіх студэнтаў, якія атрымліваюць стыпендыі, паведамляе Офіс Ціханоўскай.
Яшчэ раней беларусам дазволілі атрымліваць віды на жыхарства з мэтай уз’яднання сям’і.
Таксама, у адрозненне ад грамадзянаў Расеі, беларусы могуць наведваць Чэхію па кароткатэрміновых шэнгенскіх візах, выдадзеных іншымі краінамі. Таксама ў Чэхіі працуе візавая праграма «Грамадзянская супольнасць», па якой рэпрэсаваныя беларусы могуць атрымліваць усе тыпы доўгатэрміновых візаў і побытаў.
Акрамя гэтага, Ціханоўская заклікала чэшскіх сенатараў прызнаць ГУБАЗіК і КДБ тэрарыстычнымі арганізацыямі, і разгледзець прызнанне рэжыму Лукашэнкі тэрарыстычным.
Алена Рувіна belsat.eu