У самаабвешчаных ЛНР, ДНР і Херсонскай вобласці хочуць неадкладна правесці рэферэндум


Грамадскія палаты «ЛНР» і «ДНР» запатрабавалі неадкладна правесці рэферэндум аб прызнанні рэгіёнаў суб’ектамі Расеі, паведамляе «Интерфакс». Прарасейскія ўлады Херсонскай вобласці таксама папрасілі правесці рэферэндум аб прыняцці рэгіёну ў склад РФ.

Выбаршчыкі самаабвешчанай ДНР на ўчастку для галасавання.
Фота: РИА Новости

Грамадская палата самаабвешчанай ЛНР звярнулася да кіраўніка рэспублікі Леаніда Пасечніка аб далучэнні да Расеі. Уваходжанне ў склад РФ, на думку аўтараў звароту, «засцеражэ тэрыторыю ЛНР і адкрые новыя магчымасці для яе аднаўлення».

Грамадская палата самаабвешчанай ДНР таксама звярнулася да кіраўніка рэспублікі Дзяніса Пушыліна з ініцыятывай правесці рэферэндум аб прызнанні рэгіёну суб’ектам Расеі.

У «ДНР» заявілі, што хочуць бачыць паміж рэспублікай і Украінай мяжу Расеі.

Таксама намеснік кіраўніка прызначанай Расеяй адміністрацыі Херсонскай вобласці Кірыл Стрэмаусаў заявіў, што мясцовыя жыхары хочуць паскорыць правядзенне рэферэндуму, каб «атрымаць гарантыі ўваходжання рэгіёну ў склад РФ».

«Жыхары Херсонскай вобласці звяртаюцца і хочуць як мага найхутчэйшага правядзення рэферэндуму, таму што баяцца, што Расея сыдзе, людзі хочуць упэўненасці ў тым, што іх не пакінуць», – сказаў Стрэмаусаў.

Першапачаткова рэферэндумы аб «далучэнні да Расеі» самаабвешчаных ЛНР і ДНР, а таксама акупаваных тэрыторый іншых украінскіх абласцей павінны былі прайсці ў сярэдзіне верасня. Аднак з-за паспяховага контрнаступлення ўкраінскіх войскаў у пачатку верасня рэферэндумы былі адкладзеныя на нявызначаны тэрмін.

Аналітыка
Навошта Расеі «рэферэндумы» на акупаваных тэрыторыях, і прычым тут ЦВК Беларусі?
2022.09.02 12:51

Алена Рувіна belsat.eu

Стужка навінаў