18 верасня Колпінскі раённы суд Санкт-Пецярбургу пастанавіў прымусова выправадзіць беларуса Сяргея Непагоду з Расейскай Федэрацыі за парушэнне міграцыйнага рэжыму (арт. 18.8 КаАП РФ). Пра гэта belsat.eu паведаміла праваабаронца Дзіна Мусіна.
Па словах праваабаронцы, пасля суда Сяргея перавязуць у Цэнтр часовага ўтрымання замежных грамадзянаў (ЦВСІГ) у Чырвоным Сяле для наступнага выправаджэння ў Рэспубліку Беларусь.
«Суддзя Браслаўская вынесла рашэнне аб прымусовым выдварэнні, нягледзячы на забарону такой працэдуры, які прапісаны ва ўказе Прэзідэнта РФ. Сяргей Непагода знаходзіцца ў працэдуры атрымання прытулку ў РФ», – паведаміла Дзіна Мусіна.
«Мы ўпэўненыя, што ў дадзеным выпадку адміністрацыйнае выправаджэнне падмяняе працэдуру экстрадыцыі, і гэта зроблена з адзінай мэтай – выдаць Сяргея, нягледзячы ні на што, у Беларусь», – дадала Мусіна.
Яна адзначыла, што ЦСВІГ, дзе будзе ўтрымлівацца Сяргей, гэта дэпартацыйны цэнтр з турэмнымі ўмовамі. Так што, па сутнасці, ён будзе знаходзіцца пад вартай.
Адвакаты «Гражданского содействия» будуць абскарджваць рашэнне Колпінскага раённага суда.
Да гэтага Сяргея Непагоду паўгода трымалі ў адным з СІЗА Санкт-Пецярбургу. 16 верасня ён павінен быў выйсці на свабоду, так як скончыўся тэрмін яго ўтрымання пад вартай. Але ў гэты ж дзень ён быў паўторна затрыманы за парушэнне міграцыйнага рэжыму (арт. 18.8 КоАП). Ягоную справу ў Колпінскім судзе пачалі разглядаць яшчэ ў пятніцу 17 верасня, але вярнулі пратакол у паліцыю. 18 верасня суд прыняў рашэнне аб яго прымусовым выправаджэнні ў Беларусь.
У Беларусі на Сяргея Непагоду завялі крымінальную справу паводле ч. 2 арт. 363 КК РБ («Супраціў супрацоўніку органаў унутраных справаў») пасля падзей 19 чэрвеня 2020 года ў Маладзечне. У выпадку выправаджэння з Расейскай Федэрацыі ў Беларусі яго чакае турма.
ЗК/ІР belsat.eu
