Як стала вядома «Белсату», вечарам 19 жніўня выйшлі на волю дырэктар «Прэс-клубу» Сяргей Альшэўскі, заснавальніца «Прэс-клубу» Юлія Слуцкая, праграмная дырэктарка Ала Шарко і аператар Пётр Слуцкі.
Як піша «Прэс-клуб», вызвалілі іх паводле памілавання. Яны былі за кратамі восем месяцаў.
Усіх іх затрымалі 22 снежня 2020 года ў межах «справы Прэс-клубу». Слуцкую затрымалі проста ў аэрапорце, калі яна вярталася з адпачынку. Затрыманых у «справе «Прэс-клубу» прызналі палітвязнямі.
Сяброў «Прэс-клубу» вінавацілі ў нясплаце падаткаў нібыта ў сувязі з «праектам грамадскай тэлевізіі» былых супрацоўнікаў дзяржаўных тэлеканалаў. Сваякі затрыманых перавялі на рахунак Следчага камітэту 109 769 беларускіх рублёў і 58 капеек, такая сума, паводле следчых, складае недаплачаныя падаткі «Прэс-клубу».
19 жніўня 2021-га Юлію Слуцкую, Пятра Слуцкага, Сяргея Альшэўскага і Алу Шарко вызвалілі са Следчага ізалятару № 1 у Менску.
За кратамі застаюцца аператар «Прэс-клубу» Дзяніс Сакалоўскі (былы аператар дзяржаўнага тэлебачання) і затрыманая ў межах «справы Прэс-клубу» былая супрацоўніца БТ, сябра асноўнага складу Каардынацыйнай рады Ксенія Луцкіна.
Кіраўніка Акадэміі «Прэс-клуба» Сяргея Якупава перад Новым годам дэпартавалі ў Расею, не выставілі абвінавачвання.