На сустрэчы 19 жніўня з міністрам падаткаў і збораў ды кіраўніком Камітэту дзяржаўнага кантролю Аляксандр Лукашэнка заявіў, што бізнесоўцы, якія хочуць ісці ва ўладу, павінны разумець, што «палітыка і бізнес – гэта рэчы розныя».
Лукашэнка адзначыў, што любога бізнесоўца, які пойдзе ў палітыку, будуць жорстка правяраць, і папярэдзіў, што калі прадпрымальнік «замазаўся, то яго высвецяць і раздзенуць да майткоў».
«Гэта не значыць, што бізнесоўцам, кіраўнікам кампаніяў забаронена ісці ва ўладу. Можна. Але для гэтага ёсць выбары. Ідзіце, змагайцеся і будзьце непадкупнымі ды рабіце так у жыцці, каб не было за што цябе зачапіць.
Калі ты дзесьці замазаўся і ў палітыку ідзеш, яшчэ і да ўлады рвешся, то цябе высвеціць, распрануць да майткоў і пакажуць, хто ты ёсць. Так заўсёды адбываецца. Таму трэба ісці ва ўладу з чыстымі рукамі», – заявіў Лукашэнка.
Таксама ён адзначыў, што «ўсяго ў законах не прапішаш, і законы ёсць розныя».
«Палітыка і бізнес – гэта рэчы розныя, і законы розныя, што ў палітыцы, што ў бізнесе. Любы бізнесовец, які хоча займацца палітыкаю, павінен строга кіравацца законам. Палітыкі і бізнесоўцы павінны выконваць законы. І не трэба на ўладаў крыўдзіцца», – сказаў Лукашэнка.
Напрыканцы Лукашэнка падсумаваў, што прадпрымальнікі павінны годна аплочваць працу работнікаў, а не думаць толькі пра тое, як набіць свае ўласныя кішэні.
Адзін з галоўных апанентаў Лукашэнкі на леташніх выбарах – банкір Віктар Бабарыка быў асуджаны на 14 гадоў.
АД, belsat.eu