На заяву Генеральнага пракурора Андрэя Шведа спыненая дзейнасць пяці незалежных прафсаюзаў Беларусі. Такое рашэнне вынес Вярхоўны Суд.
Рашэнне Вярхоўнага Суда ліквідуе:
- Свабодны прафсаюз Беларускі;
- Свабодны прафсаюз металістаў;
- Беларускі незалежны прафсаюз гарнякоў, хімікаў, нафтаперапрацоўнікаў, энергетыкаў, транспартнікаў, будаўнікоў і іншых работнікаў;
- Беларускі прафсаюз работнікаў радыёэлектроннай прамысловасці;
- Асацыяцыю прафсаюзаў «Беларускі кангрэс дэмакратычных прафсаюзаў».
У пазове аб спыненні дзейнасці прафсаюзаў сцвярджаецца, што «замест абароны працоўных і сацыяльна-эканамічных правоў сябраў прафсаюзаў, прадухілення незаконных забастовак, прастояў, эскалацыі ў грамадстве кіраўнікі і шэраг сябраў названых прафсаюзаў прымалі актыўны ўдзел у дэструктыўнай дзейнасці, масавых мерапрыемствах, якія парушаюць грамадскі парадак, распаўсюджвалі інфармацыйную прадукцыю экстрэмісцкага зместу».
Таксама паведамляецца, што паводле ўсіх фактаў іх «супрацьпраўнай» дзейнасці распачатыя крымінальныя справы і прынятыя меры адміністратыўнага ўздзеяння.
У Беларусі працягваецца ціск на незалежныя прафсаюзы. У сярэдзіне траўня праваабарончая супольнасць прызнала палітвязнямі 10 прадстаўнікоў незалежных прафсаюзаў, зняволеных у красавіку.
Алена Рувіна belsat.eu
