Сёння групоўка расейскіх войскаў пачала ўзмоцненую атаку на ўсходзе Украіны. Генеральны штаб Збройных сілаў адзначыў, што Харкаў, Ізюм, Мікалаеў і Марыупаль зазналі магутныя бомбавыя атакі. Паводле вайскоўцаў, на гэты дадзены момант марыупальскі завод «Азоўсталь» знішчаны практычна цалкам, паведамляе УНІАН.
Тэрыторыя заводу «Азоўсталь» сталася адным з апошніх і гераічных пунктаў абароны Марыупалю. На завадскіх прасторах знайшлі прытулак не толькі вайскоўцы, але і цывільныя асобы, якія засталіся без жытла ды прыкметаў цывілізацыі ў горадзе.
Намеснік камандзіра палка «Азоў» Святаслаў Каліна заявіў, што вайскоўцы будуць абараняць горад да апошняга: «Мы будзем ваяваць, будзем выкарыстоўваць кожны патрон, які застаўся ў нас, але мы заклікаем радзіму ўратаваць цывільных, параненых і забраць целы». Адзначыў таксама, што на завод скідаюцца звышмагутныя бомбы, а пад заваламі застаецца шмат людзей.
Нагадаем, што сёння ўкраінскі бізнесовец Сяргей Тарута заявіў пра некалькі магутных бомбаў, што прыляцелі ў мясцовы шпіталь, пад заваламі якога засталіся каля 300 чалавек, сярод якіх маглі быць дзеці.
Украінскія тэлеграм-каналы пішуць, што выбух было чуваць за 100 км ад Марыупалю.
Пазней дарадца мэра Марыупалю Пятро Андрушчанка запэўніў, што ў шпіталі каля «Азоўсталі» не хаваліся людзі:
«Так, у Марыупалі зона «Азоўсталі» – пад шчыльным бамбаваннем звышцяжкімі бомбамі. Але ў зоне вакол заводу ўжо даўно ніхто не хаваецца, асабліва ў разбураным да гэтага будынку шпіталю».
ЗХ belsat.eu