Міністр замежных справаў Уладзімір Макей 19–20 красавіка будзе з працоўным візітам у Швейцарыі.
Візіт Макея звязаны з удзелам у 69-й сесіі Еўрапейскай эканамічнай камісіі ААН.
Плануецца, што міністр правядзе сустрэчу з генеральным дырэктарам САЗ Тэдрасам Гебрэесусам, генеральным дырэктарам Сусветнай арганізацыі інтэлектуальнай уласнасці Дарэнам Танам, вярхоўным камісарам ААН у пытаннях правоў чалавека Мічэль Бачэлет і прэзідэнтам Міжнароднага камітэту Чырвонага Крыжа Пэтэрам Маўрэрам.
«У фокусе ўвагі – актуальныя пытанні міжнароднага парадку дня ў сферах дзейнасці контрпартнёраў, беларускі падыход да праблемаў, якія знаходзяцца ў зоне адказнасці кожнай з названых арганізацыяў, а таксама іншыя тэмы, якія ўяўляюць узаемную цікавасць», – адзначаецца ў прэс-рэлізе МЗС.
Нагадаем, што 25 лютага ў Жэневе на 46-й сесіі Рады ААН у справе правоў чалавека вярхоўны камісар ААН у правах чалавека Мічэль Бачэлет заявіла, што ў Беларусі назіраецца крызіс «беспрэцэдэнтных маштабаў» у галіне правоў чалавека. Яна адзначыла «шматлікія і шырокія парушэнні, учыненыя ў кантэксце выбараў, сістэматычныя адмаўленні фундаментальных свабодаў, масавыя незаконныя арышты».
24 сакавіка Рада ў правах чалавека Арганізацыі Аб’яднаных Нацыяў прыняла рэзалюцыю аб Беларусі. Дакумент абавязвае офіс вярхоўнага камісара ААН у сферы правоў чалавека збіраць, аналізаваць і захоўваць доказы рэпрэсіяў у Беларусі падчас і пасля прэзідэнцкіх выбараў 2020 года для прыцягнення вінаватых да адказнасці.
ІІ belsat.eu
