Ізраільская кампанія больш не будзе прадаваць тэхналогіі ўзлому тэлефонаў у Беларусь і Расею
Ізраільская кампанія «Cellebrite», што выпускае праграмныя комплексы для спецслужбаў для вымання звестак з мабільных тэлефонаў, пастанавіла спыніць продаж у Беларусь і Расею. Пра гэта піша «Haaretz».
Генеральны дырэктар кампаніі Ёсі Карміль заявіў: «Cellebrite» дапамагае праваахоўным органам і арганізацыям рабіць нашае жыццё больш бяспечным, падаючы рашэнні для законнага атрымання лічбавых доказаў падчас крымінальных расследаванняў і грамадзянскіх працэсаў».
Выданне dev.by знайшло 17 тэндарных заявак ад Следчага камітэту і Камітэту судовых экспертызаў Беларусі на куплю прадукцыі «Cellebrite» – сістэмы UFED, абнаўлення ліцэнзіяў, тэхнічнага падтрымання, злучальных кабеляў. Першы такі закуп адбыўся ў 2013 годзе, апошні – у траўні 2019-га.
Спынення супрацы кампаніі з уладамі Расеі і Беларусі дамагаўся юрыст і праваабаронца Эйтай Мак. Ён звяртаў увагу на пераслед у гэтых краінах апазіцыянераў і актывістаў. Раней яму ўжо ўдалося прымусіць «Cellebrite» адмовіцца ад супрацы з кітайскаю паліцыяй пасля здушэння акцыяў пратэсту ў Гон-Конгу.
МГ belsat.eu
