Беларускія палітыкі і праваабаронцы паведамляюць пра чарговую хвалю затрыманняў і ператрусаў.
19 студзеня была затрыманая сябра прэзідыума Беларускай сацыял-дэмакратычнай партыі (Грамада), адна з адміністратараў партыйнага тэлеграм-каналу «БСДП» Людміла Волкава. Як паведаміў у Facebook кіраўнік партыі Ігар Барысаў, да яе на працу прыйшлі праваахоўнікі, пасля разам з ёй яны накіраваліся да Людмілы дамоў, дзе зладзілі ператрус.
Таксама ў партыйным тэлеграм-канале сімволіка БСДП была замененая на дзяржаўны герб, а ўсе падпісчыкі былі выдаленыя. Зараз яго праца адноўленая.
Актывістку абвінавачваюць паводле арт. 342 КК («Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх»).
Між тым «Беларуская рада культуры» паведамляе, што затрыманы пісьменнік і журналіст Севярын Квяткоўскі. Высвятляем акалічнасці.
А «Mayday Team» паведамляе пра ператрусы ў сябраў грамадскай арганізацыі «Магілёўскі праваабарончы цэнтр» – адзінай у Беларусі рэгіянальнай арганізацыі праваабаронцаў, зарэгістраванай уладамі.
18 студзеня сілавікі ў цывільным заявіліся да сябра праўлення МПЦ Аляксандра Паўловіча, аднак нічога не канфіскоўвалі.
Раніцай 19 студзеня яны ўварваліся да чальца кантрольна-пагаджальнай камісіі 82-гадовай Яўгеніі Цюркінай, у якой канфіскавалі сістэмны блок камп’ютара.
У гэты ж дзень з працы забралі яшчэ аднаго сябра МПЦ Васіля Ліпскага. Яго завезлі ў ягоную кватэру, якую таксама абшукалі, але нічога не канфіскавалі.
МГ belsat.eu