Пячэрскі суд Кіева 19 студзеня пастанавіў не арыштоўваць былога прэзідэнта Украіны, аднаго з лідараў апазіцыі Пятра Парашэнку. Пра гэта паведамляе ««Українська правда».
Яму выбралі меру стрымання ў выглядзе абавязку з’яўляцца ў суд, да следчага або да пракурора.
Пашпарт для выезду за мяжу Парашэнка мусіць здаць на час следства.
Тэрмін абавязкаў дзее да 19 сакавіка.
Нагадаем, што ў снежні 2021 года Дзяржаўнае бюро расследаванняў паведаміла, што палітыка падазраюць у дзяржаўнай здрадзе і садзейнічанні дзейнасці тэрарыстычным арганізацыям. Гаворка пра пастаўкі ў 2014–2015 гадах вугалю з не падкантрольных Кіеву тэрыторыяў на больш як $ 55 млн. За гэта Парашэнку пагражае да 15 гадоў пазбаўлення волі. 17 снежня 2021 года Парашэнку спрабавалі ўручыць пісьмовае паведамленне аб падазрэнні, аднак ён вылецеў з Украіны.
Праз месяц былы прэзідэнт усё ж вырашыў вярнуцца ва Украіну. У аэрапорце яго сустракалі тысячы прыхільнікаў і сілавікі. Там яго не затрымалі, але надзвычай доўга правяралі пашпарт. Пасля выступу перад прыхільнікамі, Пятро Парашэнка накіраваўся ў Пячорскі суд у Кіеве.
МГ belsat.eu
