Федэрацыя веславання размясціла на сваім афіцыйным сайце абвестку аб пошуку галоўнага трэнера нацыянальнай зборнай. Які прапаноўваюць заробак, не паведамляюць.
Пошук галоўнага трэнера будзе завершаны 3 лістапада, прэтэндэнт абавязаны паведаміць пра асабістыя дасягненні ў рыхтаванні пераможцаў і прызёраў (фіналістаў) Алімпійскі гульняў, чэмпіянатаў свету і Еўропы, пераможцаў і прызёраў чэмпіянатаў свету і Еўропы сярод спартоўцаў да 23 гадоў, пераможцаў і прызёраў чэмпіянатаў свету сярод спартоўцаў да 18 гадоў.
Таксама падаць рэкамендацыі дзвюх асобаў і адказаць на галоўнае пытанне: «Чаму вы лічыце, што зможаце ўзначаліць нацыянальную каманду Рэспублікі Беларусь у акадэмічным веславанні?»
Цяпер нацыянальную зборную Беларусі ўзначальвае 68-гадовы ўкраінец Юрый Радзівонаў.
Ён вазіў беларускіх «акадэмікаў» на апошнюю Алімпіяду ў Токіа, дзе найлепшым вынікам стала восьмае месца Сяргея Валадзька і Змітра Фурмана.
Раней беларускае акадэмічнае веславанне рэгулярна прыносіла краіне медалі, але ўжо трэцюю запар Алімпіяду прадстаўнікі гэтага віду спорту вяртаюцца без узнагародаў.
Акадэмічнае веславанне абʼяднанае ў адну федэрацыю з веславаннем на байдарках і каноэ. Доўгі час федэрацыю ўзначальвае Аляксандр Машэнскі – уладальнік «Санты» і «Савушкінага прадукту», якога называюць «гаманцом» Лукашэнкі. Нядаўна ён быў зноў пераабраны на пасаду кіраўніка Федэрацыі веславання.
АС belsat.eu