Рэгістрацыя нелегальных мігрантаў пачалася ў вёсцы Відзяняй Варэнскага раёну Літвы, паведамляе карэспандэнт belsat.eu. Падчас рэгістрацыі людзі маюць права ці папрасіць палітычнага прытулку, ці выказаць жаданне вярнуцца дадому. Тым, хто гатовы вярнуцца ў краіну свайго грамадзянства, літоўская дзяржава плоціць 300 еўраў і набывае квіток на самалёт.
Гэтую працу выконваюць мабільныя каманды, у якую ўваходзяць прадстаўнікі Дэпартаменту міграцыі, Міністэрства замежных справаў, памежкі, перакладчыкі ды іншыя.
У школе, дзе былі зробленыя гэтыя здымкі, часова размешчаныя 146 мігрантаў з афрыканскіх краінаў – Судан, Эрытрэя, Малі, Самалі ды іншых.
Паводле Эвеліны Гудзінскайце, дырэктаркі Дэпартаменту міграцыі, ведамства ўжо разгледзела каля 200 заяваў аб прытулку, але ўсе яны былі адхіленыя.
Людзі пазначаюць розныя прычыны, чаму яны пастанавілі пакінуць радзіму. Ёсць тры групы: хто хоча жыць лепш праз эканамічныя прычыны, іншыя ўцякаюць ад гвалту, ёсць былыя студэнты з Беларусі, якіх праз нястачу грошай выгналі з універсітэтаў.
ГР belsat.eu
