Вярхоўны суд прызнаў тэрарыстычнай арганізацыю «Атрады грамадзянскай самаабароны Беларусі». Пра гэта паведамляе Генпракуратура.
Дзейнасць АГСБ на тэрыторыі Беларусі забароненая ад 18 жніўня.
Раней у Генеральнай пракуратуры заяўлялі, што арганізацыя была створаная ў верасні 2020 года пад кіраўніцтвам грамадзяніна Нямеччыны 1986 года нараджэння, а мэтай яе дзейнасці называлася аб’яднанне радыкальна настроеных грамадзянаў для ўдзелу ў акцыях з гвалтоўнаю зменаю дзяржаўнай улады і тэрактах у Беларусі.
У тэлеграм-чатах і каналах падпісантаў нібыта навучалі правілам збору самаробных выбуховых прыладаў і тактыцы сілавога супрацьдзеяння сілавым структурам.
Таксама ў ведамстве паведамілі, што па фактах нібыта здзяйснення сябрамі арганізацыі тэрактаў пачатыя і расследуюцца крымінальныя справы паводле артыкулаў 289 («Акт тэрарызму») і 359 («Акт тэрарызму ў дачыненні дзяржаўнага або грамадскага дзеяча») Крымінальнага кодэксу.
МГ belsat.eu