Прыёмная кампанія ва ўстановах вышэйшай адукацыі для большасці спецыяльнасцяў на бюджэтную форму навучання пачынаецца 18 ліпеня і працягнецца да 24 ліпеня, паведаміў начальнік галоўнага ўпраўлення прафесійнай адукацыі Міністэрства адукацыі Сяргей Каспяровіч, перадае БелТА.
Унутраныя іспыты на бюджэтныя месцы пройдуць з 25 ліпеня да 2 жніўня, а залічэнне завершыцца 4 жніўня. Далей будзе этап дадатковага набору на навучанне за кошт сродкаў бюджэту з 5 да 7 жніўня.
Прыём дакументаў на платную форму навучання стартуе таксама 18 ліпеня, аднак працягнецца ён да 8 жніўня. Залічэнне завершыцца 10 жніўня.
Усяго сёлета ЦТ прайшлі больш за 60 тыс. абітурыентаў, аднак ВНУ плануюць прыняць не ўсіх – каля 53,5 тыс. абітурыентаў. На бюджэтную форму плануюць прыняць больш за 27,7 тыс. асобаў, на платную – больш за 25,5 тыс. абітурыентаў.
Таксама Сяргей Каспяровіч адзначыў, што з новага навучальнага года для паступлення адкрытыя 15 новых спецыяльнасцяў, «новых як для краіны, так і новых для асобных ВНУ».
Алена Рувіна belsat.eu