Вінаваты Захад, мы за мір: Макей расказаў пра вайну і санкцыі, пагражаў «наймітам». Сціслы пераказ

На штогадовым семінары кіраўнікоў дыпламатычных прадстаўніцтваў і на наступным адкрыцці выставы пра Другую сусветную вайну Макей скардзіўся, вінаваціў, пагражаў. «Белсат» каротка пераказвае, што перадалі дзяржаўныя медыі.

Міністр замежных справаў Беларусі Уладзімір Макей на прэс-канферэнцыі абяцае, што «Беларусь ніколі не прыедзе ва Украіну на танку». Менск, Беларусь. 16 лютага 2022 года.

Фота: mfa.gov.by

Міністр замежных справаў Беларусі Уладзімір Макей 18 ліпеня выступіў перад дыпламатамі на штогадовым семінары кіраўнікоў дыпламатычных прадстаўніцтваў і консульскіх установаў і на адкрыцці выставы «Генацыд беларускага народу ў гады Вялікай айчыннай вайны». Ягоныя заявы перадала дзяржаўнае інфармацыйнае агенцтва БелТА. Вось што ён казаў.

Пра працу МЗС

• Дыпламаты працуюць цяпер «у вельмі няпростай абстаноўцы», бо супраць Беларусі ідуць «гібрыдная, эканамічная і інфармацыйная вайна», і за год сітуацыя стала цяжэйшай – «нашмат больш дыскамфортнай». Патрэбныя «новыя прадуманыя дзеянні ў адказ».
• Гэты «агрэсіўны гібрыдны ўплыў з боку калектыўнага Захаду» «навучыў нас бараніцца». «Ваенная мова сёння ўсё часцей больш дарэчная, чым дыпламатычная», але «відавочная адэкватнасць і непарушнасць нашай пазіцыі».
• «Што да нашай палітыкі надалей, яна будзе залежаць ад паводзінаў заходніх партнёраў. Мы ні ў якай меры не маем намеру спрыяць нагнятанню гонкі ўзбраенняў, канфрантацыі. Наадварот, мы зацікаўленыя ў забеспячэнні большай стабільнасці, міру і спакою ў нашым рэгіёне».

Пра санкцыі

• «Мы дэталёва вывучылі ўсе выпадкі, звязаныя з арыштам беларускай маёмасці за мяжой. Без адказу ў будучыні гэтыя дзеянні не застануцца».
• У працы Міністэрства замежных справаў нарошчванне экспарту «застаецца абсалютным прыярытэтам». За пяць месяцаў з пачатку поўнамаштабнай вайны Расеі супраць Украіны беларускі экспарт тавараў упаў на 4,4 % або 650 млн долараў – скараціліся збольшага пастаўкі нафты і нафтапрадуктаў, калійных і азотных угнаенняў. Затое вырас экспарт астатніх тавараў – на 4 % або 460 млн долараў.

Пра вайну ва Украіне

• У расейскім нападзе на Украіну, «маштабных ваенных дзеяннях непасрэдна ля нашых межаў», вінаватая «безадказная палітыка Захаду». Яна таксама вылілася ў «беспрэцэдэнтнае нарошчванне вайсковай прысутнасці NATO на паўночных і заходніх межах нашай дзяржавы», «бясконцае і бяздумнае раскручванне санкцыйнай спіралі».
• Беларусы, якія ваююць на баку Украіны, гэта «найміты», ім пагражае крымінальная адказнасць, яны «мусяць разумець, што могуць атрымаць напоўніцу», «паводле законаў ваеннага часу».
• «Абставіны складаюцца такім чынам, што многія разважныя палітыкі ўжо сёння задумваюцца над тым, як жыць далей, які светапарадак нас задаволіць. А гэта павінен быць такі светапарадак, які б забяспечваў мір, спакой і стабільнасць на планеце».

Пра краіны Балтыі

• Рэакцыя Латвіі на паездку латвійскіх падлеткаў да Лукашэнкі – «жахлівыя, дзіўныя рэчы, якія адбываюцца з нашымі заходнімі партнёрамі ці контрпартнёрамі», на Захадзе «свабода слова знішчаецца ў зародку».
• Для жыхароў Латвіі, Літвы і Польшчы не выключанае спрашчэнне атрымання беларускага грамадзянства – на прапанову дэпутата Алега Гайдукевіча «трэба паглядзець». Бязвізавы ўезд, уведзены для літоўцаў і латвійцаў у красавіку і для палякаў у ліпені, «апраўдаў сябе».

Пра Другую сусветную вайну

• «Сёння, каб дагадзіць палітычным амбіцыям асобных элітаў Захаду, плодзіцца шмат фэйкаў аб выніках Другой сусветнай вайны, скажаюцца ўстояныя гістарычныя факты».
• «Беларусь рабіла і працягвае рабіць усё магчымае для спрыяння дыялогу і пошуку шляхоў падтрымання міжнароднага міру і бяспекі, захавання і ўмацавання гістарычнай праўды».
• Ініцыятыву беларускіх уладаў наконт «генацыду беларускага народу» ў час Другой сусветнай вайны агучваць усім «дзяржавам-партнёрам», але партнёры ёсць «адэкватныя» і «неадэкватныя».

Алесь Наваборскі belsat.eu