Аляксандр Лукашэнка падпісаў 18 ліпеня змены ў Кодэкс аб зямлі. Абноўленую версію пакуль не публікавалі афіцыйна, таму аб зменах можна меркаваць з паведамленняў дзяржаўных медыяў.
Здымак мае ілюстрацыйны характар. Барысаўскі раён, Беларусь. 5 чэрвеня 2021 года.
Фота: АЗ / Белсат
Паводле паведамлення прэс-службы Аляксандра Лукашэнкі, змены такія:
- Для будаўніцтва жылых дамоў у сельскіх населеных пунктах цяпер можна даваць грамадзянам участкі да 1 гектару (было да 0,25 га).
- Цягам пяці гадоў можна на льготных умовах выкупіць у прыватную ўласнасць або ўзяць у арэнду на 99 гадоў участкі, якія будуць у «землекарыстальніка» на 1 верасня 2022 года. Для Менску і абласных цэнтраў зніжка 20 %, для іншых тэрыторыяў – 50 %.
- Абмежаванне ў праве распараджацца ўчасткамі для тых, хто атрымаў іх з чаргі на паляпшэнне жыллёвых умоваў, цяпер трывае не 8 гадоў, а 5.
- Можна будзе раздзяляць зямельныя ўчасткі для будаўніцтва нават да завяршэння будаўніцтва.
- Можна мяняць прызначэнне ўчасткаў і іх межы пры ўмове выкупу ці арэнды на 99 гадоў.
- Нейкім чынам рэгламентаваныя пытанні самавольна занятых участкаў і самавольнага будаўніцтва (падрабязнасці не паведамляюць).
- Аблвыканкамам даецца права выбіраць тэрыторыі, дзе зямельныя ўчасткі прадаюцца без аўкцыёнаў.
- «Непрыдатныя да іншага выкарыстання» землі можна будзе ўключаць у населеныя пункты або ўтвараць на іх новыя населеныя пункты (як то хутары).
Змены ў кодэкс набудуць моц праз нейкі час пасля афіцыйнай публікацыі. Праз які менавіта (адразу, праз месяц, праз год…), мае быць прапісана ў адпаведным законе.
Hавiны
Звыкліся з думкай. Кватэры, дамы, лецішчы тых, хто з’ехаў, паступаюць у продаж
2022.07.08 16:26
Алесь Наваборскі belsat.eu
