Літва з 18 чэрвеня спыняе транзіт праз сваю тэрыторыю ў Калінінградскую вобласць РФ тавараў, якія трапілі пад санкцыі Еўразвязу. Пра гэта распавёў у тэлеграм-канале губернатар расейскага рэгіёну Антон Аліханаў.
Паводле Аліханава, Літоўская чыгунка апавясціла Калінінградскую чыгунку, што спыняе пропуск транзіту з Калінінградскай вобласці і ў Калінінградскую вобласць з іншых рэгіёнаў Расейскай Федэрацыі вялікага пераліку тавараў пад еўрапейскімі санкцыямі.
Губернатар адзначыў, што Літва атрымала тлумачэнні Еўракамісіі: выключэнні ў санкцыях ЕЗ не датычаць калінінградскага транзіту.
Чакаюць, што забарона закране ад 40 % да 50 % наменклатуры грузаў, якія перавозіліся паміж Калінінградскай вобласцю ды іншымі рэгіёнамі РФ, у тым ліку будаўнічыя матэрыялы, цэмент, метал і г. д.
Нагадаем, што чыгуначны транзіт з Расеі ў Калінінградскую вобласць праходзіць таксама праз тэрыторыю Беларусі.
З 4 чэрвеня Літоўская чыгунка спыніла транспартаванне беларускай прадукцыі дрэваапрацоўвання, а таксама гумовых і металічных вырабаў. Адпаведнае рашэнне адносна падсанкцыйнай прадукцыі было прынятае яшчэ 17 траўня. Увесь гэты час чыноўнікі Лукашэнкі дэманстравалі спакой і ўпэўненасць: маўляў, нічога страшнага, перанакіруем усю лагістыку на Расею і Кітай.
Якуб Хруст belsat.eu
