«Супольная аперацыя з ФСБ». У КДБ распавялі новыя дэталі справы пра «замах» на Лукашэнку

Будынак КДБ у Менску. Фота: wikimapia.org

Начальнік аддзелу следчага ўпраўлення КДБ Беларусі Канстанцін Бычак у эфіры тэлеканалу ОНТ распавёў новыя дэталі справы пра нібыта «замах» на Аляксандра Лукашэнку.

Канстанцін Бычак заявіў, што аператыўна-вышуковыя мерапрыемствы працягваліся больш за 6 месяцаў. Паводле яго, гэта адбывалася падрыхтоўка дзяржаўнага перавароту.

ЗША абвяргаюць датычнасць да «замаху» на Лукашэнку

Прадстаўнік КДБ заявіў, што Юрась Зянковіч быў звязаны са спецслужбамі ЗША і ажыццяўляў у Беларусі пошук, вербаванне і подкуп вайскоўцаў і супрацоўнікаў праваахоўных органаў, гатовых удзельнічаць у сілавым звяржэнні дзейнай улады за ўзнагароджанне. Нібыта зафіксавана два выпадкі перадачы грошай.

Бычак адзначыў, што ў сакавіку КДБ атрымаў інфармацыю аб магчымым прыбыцці Зянковіча ў Маскву. Там была праведзеная сумесная спецаперацыя з ФСБ Расеі.

Пачатая крымінальная справа паводле арт. 357 КК. Затрыманым пагражае ад 8 да 12 гадоў пазбаўлення волі. Зараз яны знаходзяцца ў СІЗА КДБ.

«Гэта была адкрытая размова, запіс рассылаўся шмат каму». Ігар Макар адказаў на новыя абвінавачанні ўладаў

17 красавіка Аляксандр Лукашэнка заявіў, што затрыманыя ў Беларусі і Расеі беларускія апазіцыйныя палітыкі Аляксандр Фядута, Рыгор Кастусёў і Юрась Зянковіч нібыта рыхтавалі з дапамогай амерыканскіх спецслужбаў дзяржаўны пераварот і замах на самога Лукашэнку. Гэтыя звесткі затым пацвердзілі ў КДБ Беларусі ды ФСБ Расеі.

Тыя фігуранты справы, якія не былі затрыманыя, абвяргаюць выстаўленыя ім абвінавачанні.

МГ belsat.eu

Hавiны