Суд Першамайскага раёну Віцебску пакараў журналіста Змітра Казакевіча двума максімальнымі штрафамі паводле ч. 3 арт. 23.5 КаАП – за супрацу з замежным выданнем без акрэдытацыі беларускага Міністэрства замежных справаў.
Суддзі Андрэй Шыдлоўскі і Вераніка Барысава прызналі журналіста вінаватым у незаконным вырабе дзвюх публікацыяў на сайце belsat.eu. У міліцэйскіх пратаколах паведамлялася, што матэрыялы аўтар напісаў, «злоўжываючы правамі і парушаючы абавязкі журналіста», паведамляе БАЖ.
Адзін з артыкулаў – гэта гісторыя пра звальненне выкладчыка медычнага ўніверсітэту, які адбыў трое содняў арышту за белыя і чырвоныя фіранкі ў сваёй кватэры, другі – пра судовы працэс над віцяблянінам, супраць якога распачалі крымінальную справу за супраціў міліцыянтам. Звесткі пра гэтыя артыкулы знайшліся падчас агляду ноўтбука журналіста, забранага міліцыянтамі падчас ператрусу.
Зміцер Казакевіч адмовіўся даваць суду тлумачэнні ў справах на знак салідарнасці са зняволенымі калегамі Дар’яй Чульцовай і Кацярынай Андрэевай. Журналіст падкрэсліў, што не лічыць сябе вінаватым, і працытаваў урывак з рамана-антыўтопіі Джорджа Оруэла «1984». Там распавядаецца, што толькі тады жыццё ў краіне можна лічыць нармальным, калі двойчы два – гэта чатыры, і ніхто не імкнецца давесці, што гэта не так.
Гэтую кнігу ў перакладзе на беларускую мову Зміцер падарыў суддзі Андрэю Шыдлоўскаму. Але той адмовіўся ад падарунка, заявіўшы, што суддзям гэта забаронена, і сам ён не чытае па-беларуску.
МГ belsat.eu