Адразу двух удзельнікаў пратэстаў у Беларусі затрымалі ў розных гарадах Расеі. На радзіме іх шукаюць сілавікі.
У Санкт-Пецярбурзе затрымалі 41-гадовага жыхара Маладзечна, які 19 чэрвеня 2020 года ў сутычцы з АМАПам паспрабаваў адбіць у сілавікоў іншага ўдзельніка акцыі. Бойка адбылася на скрыжаванні вуліцаў Вялікі Гасцінец і Багдана Хмяльніцкага ў Маладзечне, тады ў міліцыянта выпаў пісталет.
Беларуса затрымалі апоўначы 17 сакавіка ў інтэрнаце паселішча Металастрой. Крымінальную справу супраць яго пачалі 13 жніўня, пасля чаго абвесцілі ў вышук, піша «Фонтанка».
А ў Маскве затрымалі жыхара Ліды Мікалая Давідчыка, паведамляе «МБХ медиа». Раніцай яго планавалі перавесці ў СІЗА-4.
Паводле актывісткі Ланы Салановіч, расейскія сілавікі маюць намер выдаць затрыманага Беларусі, дзе яго вінавацяць у «арганізацыі і рыхтаванні дзеянняў, што груба парушаюць грамадскі парадак».
Мужчына праходзіць падазраваным у крымінальнай справе супраць трох удзельнікаў закрытай групы чату «Лида для жизни».
МГ belsat.eu
