У беларускага амбасадара ў Расеі Уладзіміра Сямашкі здарыўся сардэчны прыступ. Ён шпіталізаваны, піша тэлеграм-канал Mash.
Паведамляецца, што ў нядзелю 72-гадовы Уладзімір Сямашка паскардзіўся на праблемы з сэрцам. Ціск быў падвышаны – да 180/110 і больш, што выклікала рызыку ўскладненняў. Лекары даставілі амбасадара ў шпіталь, дзякуючы чаму выключылі рызыку інсульту.
Таксама паведамляецца, што ў Сямашкі адбылося кровазліццё ў левае вока.
Шпіталізацыю пасла пацвердзілі выданню Sputnik у пасольстве.
«Цяпер пасол Беларусі ў Расеі Уладзімір Сямашка сапраўды знаходзіцца ў медустанове Масквы на абследаванні. Яго стан цалкам здавальняючы і асцярог не выклікае. У найбліжэйшыя дні пасол пачне працаваць у дыпмісіі».
У Беларусі Уладзімір Сямашка быў міністрам энергетыкі, першым намеснікам прэм’ер міністра Беларусі, у кабінеце міністраў Андрэя Кабякова – віцэ-прэмʼерам. На пасадзе пасла Рэспублікі Беларусь у Расейскай Федэрацыі ён працуе з лістапада 2018 года.
АД, belsat.eu
