Сёння ў судзе Шчучынскага раёну адбыліся спрэчкі бакоў. Раней блогер адмовіўся даваць паказанні і адказваць на пытанні суддзі. Сваёй віны не прызнаў. Прысуд агучаць у аўторак, 21 снежня.
Вадзімаці вінавацяць у абразе дзяржаўных сімвалаў (арт. 370 КК) і абразе прэзідэнта (арт. 368 КК). Паводле пракурора, Вадзім у жніўні і верасні мінулага года выклаў у сваім Instagram фота з Лукашэнкам з подпісам «нелегітымны прэзідэнт». Гэта, на думку абвінавачання, можна разглядаць як абразу.
Другі крымінальны артыкул таксама заведзены за матэрыял у Instagram. Згодна з матэрыяламі справы, 16 жніўня 2021 года Вадзім на бензастанцыі ўзяў чырвона-зялёны сцяжок, які там прадаваўся, і выклаў сторыз, у якім сказаў, што «надта дорага каштуе кавалачак анучкі».
Вадзім Ермашук застаецца за кратамі з 16 жніўня. Яго затрымалі ў Шчучыне, калі ён аглядаў мясцовую скейт-пляцоўку. Разам з сябрамі хацеў дамагчыся таго, каб у Горадні з’явілася такая ж дзеля развіцця скейтынгу ў горадзе. Блогера затрымалі нібыта за заклікі прыехаць на спартовую масавую імпрэзу.
19 жніўня Дзмітрый Цівунчык прысудзіў блогеру 25 содняў арышту паводле арт. 24.23 КаАП. 9 верасня Вадзіма асудзілі яшчэ на 15 содняў – нібыта за хуліганства. Падчас адбыцця новага арышту стала вядома, што супраць Вадзімаці распачатыя дзве крымінальныя справы.
На судзе Вадзім трымаецца бадзёра. За кратамі пачаў маляваць коміксы.
СП belsat.eu