Міністр інфраструктуры Украіны Аляксандр Кубракоў у сваім Facebook напісаў, што праца «збожжавага калідора» працягнутая на чатыры месяцы. Гарантамі ўгоды засталіся Турцыя і ААН.
Перамовы ў Стамбуле прывялі да падаўжэння збожжавай угоды на 120 дзён, напісаў у сваім Facebook міністр інфраструктуры Украіны Аляксандр Кубракоў.
«Гарантамі ініцыятывы засталіся ААН і Турцыя. Сёння ўкраінскі сельскагаспадарчы экспарт застаецца эфектыўным інструментам процідзеяння сусветнаму харчоваму крызісу», – адзначыў міністр.
Ён удакладніў, што з 1 жніўня, калі запрацаваў «збожжавы калідор», Украіна экспартавала з трох партоў больш за 11 мільёнаў тон сельскагаспадарчай прадукцыі ў 38 краінаў. «Гэта значна, але недастаткова», – зазначыў Кубракоў і паведаміў, што Кіеў прапанаваў працягнуць угоду на год і ўнесці ў яе чацвёрты порт – мікалаеўскі. Адказу на гэтую ініцыятыву пакуль няма.
Збожжавае пагадненне было падпісанае ў Стамбуле 22 ліпеня і мусіла дзейнічаць да 19 лістапада. Яно прадугледжвае бяспечны калідор у Чорным моры для экспарту ўкраінскага збожжа і іншай сельскагаспадарчай прадукцыі з украінскіх партоў «Адэса», «Паўднёвы» і «Чарнаморск».
Сяргей Крот belsat.eu