17 жніўня на судзе ў справе «змовы з мэтай захопу дзяржаўнай улады» дапыталі ў якасці сведкаў палітыка Сяргея Калякіна і журналістку Святлану Калінкіну. Пасля гэтага быў абвешчаны вялікі перапынак: 26 жніўня, як чакаецца, пачнуцца спрэчкі бакоў. Пра гэта паведамляе «Sputnik-Беларусь».
Сёння ў судзе ў якасці сведкі дапыталі лідара Беларускай партыі левых «Справядлівы свет» Сяргея Калякіна. Пытанні пракурора да Калякіна тычыліся таго, ці запрашалі яго абвінавачваныя ўдзельнічаць у «змове з мэтай зрынання ўлады неканстытуцыйным шляхам».
Калякін паведаміў суду, што ведае трох з пяцярых абвінавачваных – Аляксандра Фядуту, Рыгора Кастусёва і Юрыя Зянковіча.
Адказваючы на пытанне дзяржаўнага абвінаваўцы, Калякін заявіў, што яму ніхто не прапаноўваў удзельнічаць у зрынанні ўлады неканстытуцыйным шляхам, таксама яму не прапаноўвалі ўдзельнічаць у Zoom-канферэнцыях. Калякін заявіў, што, на ягоную думку, абвінавачваныя не маглі мець намераў гвалтоўнага захопу ўлады ў краіне. Выходзячы з залы суда пасля допыту, Калякін пазычыў абвінавачваным поспеху.
Святлана Калінкіна, якую ў суд для дачы паказанняў выклікала абарона Фядуты, сказала, што ведае абвінавачванага з 1995 года. Яна назвала Фядуту чалавекам-энцыклапедыяй, прыхільнікам палітыкі здаровага сэнсу і адзначыла, што ніколі не сустракала ў ягонай публіцыстыцы экстрэмісцкіх матываў.
Калінкіна таксама кампліментарна выказалася ў дачыненні Кастусёва як палітыка і чалавека, нават папрасіла прабачэння за тое, што некалі дазволіла сабе рэзкае публічнае выказванне на ягоны адрас. У пракурора і суда да Калінкінай пытанняў не было.
- Аляксандра Фядуту і Юрыя Зянковіча затрымалі 12 красавіка 2021 года ў Маскве пры дапамозе ФСБ, а Рыгора Кастусёва ў той жа дзень у Шклове. Іх абвінавацілі ў змове з мэтай захопу ўлады.
- 17 красавіка 2021 года Аляксандр Лукашэнка заявіў, што ў Беларусі рыхтаваўся «вайсковы пераварот», маўляў, амерыканскія спецслужбы з санкцыі Джо Байдэна хацелі яго забіць. У сваю чаргу, ФСБ 17 красавіка апублікавала прэс-рэліз, дзе распавяла пра супольную спецаперацыю з КДБ: пра Байдэна там не было, але сцвярджалася, што «мяцеж» рыхтаваўся пры дапамозе ўкраінскіх нацыяналістаў.
- Як паведамлялася ў заяве ФСБ Расеі, Зянковіч і Фядута зарганізавалі абмеркаванне ўзброенага мяцяжу ў прыватных чатах і сустракаліся ў Маскве з «апазіцыйна настроенымі генераламі» Узброеных сілаў Беларусі. Але пазней стала вядома, што ніякіх «апазіцыйна настроеных генералаў» не існавала, гэта былі супрацоўнікі беларускіх спецслужбаў, якія выдавалі сябе за генералаў.
Глеб Нержын belsat.eu
