Прэзідэнт ЗША Джо Байдэн у сваім звароце 16 жніўня прызнаў, што ЗША зрабілі шмат памылак у Афганістане. Тым не менш, самое рашэнне вывесці амерыканскія войскі з тэрыторыі краіны ён лічыць правільным.
«Мы павінны быць сумленнымі: наша місія ў Афганістане зрабіла шмат памылак, шмат промахаў за апошнія два дзесяцігоддзі», – сказаў ён, перадае CNN.
Байдэн адзначыў, што «глыбока засмучаны фактамі, з якімі мы зараз сутыкаемся», але не шкадуе пра сваё рашэнне спыніць вайну Амерыкі ў Афганістане.
«Амерыканскія вайскоўцы не могуць і не павінны гінуць у вайне, у якой афганскія сілы не гатовыя змагацца за сябе», – сказаў ён, абвінаваціўшы мясцовае насельніцтва і афганскіх палітыкаў у нежаданні змагацца.
Паводле яго, ЗША працягнуць падтрымліваць афганскі народ.
«Таму мне зноў застаецца спытаць тых, хто сцвярджае, што мы павінны былі застацца. Колькі яшчэ пакаленняў дачок і сыноў Амерыкі вы хацелі б адправіць для барацьбы з грамадзянскай вайной у Афганістане? Калі афганскія войскі гэтага не робяць? Колькі бясконцых шэрагаў надмагілляў на нацыянальным могілках яшчэ трэба? Я выразна адказваю. Я не буду паўтараць памылак, якія мы зрабілі ў мінулым», – заявіў прэзідэнт ЗША.
На яго думку, ЗША не павінны паўтараць ранейшыя памылкі: удзел «у канфлікце, што не адпавядае нацыянальным інтарэсам Злучаных Штатаў, падваенне грамадзянскай вайны ў іншай краіне, спробы перарабіць краіну праз бясконцыя ваенныя разгортвання амерыканскіх сіл».
Нагадаем, што 15 жніўня афганскія талібы ўзялі кантроль над сталіцай Афганістану Кабулам, адкуль былі выбітыя Злучанымі Штатамі 20 гадоў таму. Эскалацыя канфлікту адбылася на тле вываду амерыканскіх войскаў з краіны.
Усё гэта суправаджаецца масавымі сведчаннямі пра людзей, якія спрабуюць любым чынам пакінуць Афганістан, каб не застаць уладу талібаў.
МГ belsat.eu